«Śpieŭny schod» padzialiŭsia

Kaardynatar prajektu Alaksiej Čubat i viadoŭca Siarhiej Doŭhušaŭ patłumačyli Tuzin.fm, čamu razyšlisia ŭ pohladach nakont raźvićcia prajektu i zajavili, što ciapier kožny ź ich budzie ładzić svoj «Śpieŭny schod».

«Ja bolš nie supracoŭničaju z Alaksiejem Čubatam. «Śpieŭnyja schody» nie spyniajucca. Napieradzie vielmi šmat usiaho. Praciahvaju rabić usio samastojna i mnie ŭ hetym dapamahajuć maje siabry, samyja aktyŭnyja naviedniki schodaŭ», — paviedamiŭ partału Tuzin.fm Siarhiej Doŭhušaŭ.

Alaksiej Čubat u svaju čarhu kaža, što taksama źbirajecca nadalej ładzić «Śpieŭnyja schody» z roznymi viadoŭcami: «U kožnaha z nas vypracavałasia svajo bačańnie, i kožny choča realizavać svaje zadumki maksymalna niezaležna».

Ideja pravodzić «Śpieŭnyja schody», na jakich usie achvočyja mahli b razam razvučyć i navučycca pravilna śpiavać biełaruskija pieśni roznych časoŭ, naležyć lideru hurtu Vuraj. Alaksiej Čubat, jaki naviedvaŭ vakalnyja kursy Siarhieja Doŭhušava, uziaŭsia dapamahčy ŭ jaje realizacyi. Za hety čas prajšło z paŭsotni imprezaŭ: «śpieŭnyja schody» jak u šyrokim farmacie, tak i vuzkim — dla dziaciej, naprykład, a taksama za miažoju, «śpieŭnyja vandroŭki» pa miaścinach Ahinskaha i Maniuški, śpieŭnyja kursy, usiaho nie pieraličaš.

Jany pracavali razam ciaham troch hadoŭ:Siarhiej zajmaŭsia tvorčaj častkaj, Alaksiej — menedžmentam i pošukam finansavańnia. Faktyčna dla adnaho «Śpieŭny schod» staŭ adnym sa sposabaŭ dla tvorčaha vyjaŭleńnia, a dla druhoha — asnoŭnaj spravaj. U hetym momancie i adbyŭsia razład.

«Dla mianie «Śpieŭnyja schody» jak i inšaja dziejnaść u sfery kultury — heta sprava, da jakoj imkniecca duša i ja zajmajusia joju z unutranaha paklikańnia. Ale lubaja prafesijnaja praca: nia tolki tvorcaŭ, ale i menedžera, pavinna apłočvacca. Tolki tak my možam uźniać na naležny ŭzrovień našu sferu kultury», — kaža Alaksiej

«U mianie niama mety zarabić na «Śpieŭnym schodzie». Dla mianie najpierš važnaja ideja. I ja liču, što hety prajekt nia musić być kamercyjnym i nichto na im nia musić zarablać. Ja adčuvaju, što heta vielmi patrebna našym ludziam. Ja nia suprać sponsaraŭ, ale nia budu śpiavać dziela hrošaj ci tolki tady, kali hetyja srodki znachodziacca», — kaža Siarhiej.

Pa vyniku, ciapier isnuje dva «Śpieŭnyja schody». «Śpieŭny schod» Alaksieja Čubata buduć vieści zaprošanyja hości.

Akcent robicca na tradycyjnuju piesiennuju spadčynu, klasykaj i pieśni XX st. zajmacca nie planujecca. Miarkujecca pracavać z kankretnymi rehijonami, jak toje było z «Paleskim Śpieŭnym schodam». Pry kancy lutaha «Schod» Čubata projdzie ŭ Bieraście, jon budzie pryśviečany kobrynska-pružanskaj piesiennaj spadčynie. Vieści jaho budzie Hanna Silivončyk.

Taksama planujecca pravieści «Dziciačy Śpieŭny schod», pryvieźci ŭ Miensk aŭtentyčny hurt ź Lubanskaha rajona, zładzić «Śpieŭnyja kursy Śpieŭnaha schodu» z vakalistkaj GUDA Viktoryjaj Michno, a taksama vydać «Śpieŭnik Śpieŭnaha schodu». Udzieł va ŭsich mierapryjemstvach — biaspłatny, za vyklučeńniem specyjalnych prajektaŭ, jak, naprykład, «Vandroŭki sa Śpieŭnym schodam».

«Śpieŭny Schod ź Siarhiejem Doŭhušavym» pravioŭ užo pieršuju imprezu, pryśviečanuju abradu «Žanićba Ciareški», nieŭzabavie maje adbycca schod, pryśviečany «Narodnamu albomu».

Nadalej Siaržuk choča pryvozić u Miensk vykanaŭcaŭ narodnych piesień z rehijonaŭ, a taksama ładzić «Haradzkija Śpieŭnyja Schody». Uvachod na ŭsie imprezy — taksama volny. Paralelna Doŭhušaŭ razam ź siabram Siarhiejem Dranicam zapuskaje prafesijnyja vakalnyja kursy ŭ pryvatnaj studyi Free Voice studio pa roznych nakirunkach: džaz, etna, rok, pryrodny hołas.

Niahledziačy na kanflikt, što Doŭhušaŭ, što Čubat miarkujuć, što hety padzieł nie zabje samu ideju «Śpieŭnych schodaŭ».

«Padzieł, jak pakazvaje sytuacyja, pracuje na ŭmacavańnie. Kaniečnie, kali adasablajecca analahičny i taki ž mocny pa patencyjału prajekt, samy čas zadumacca pra pazycyjanavańnie. Pra toje, kim my, «Śpieŭny schod», chočam być dla ŭdzielnikaŭ. Tamu prychodźcie i na «Śpieŭnyja schody», i na «Śpieŭnyja schody Sieržuka Doŭhušava»». Čym bolš budzie takoha ruchu, tym lepš dla Biełarusi!», — kaža Alaksiej.

«»Śpieŭny schod» nie zahinie, jon tolki palepšycca, bo budzie bolš novych padychodaŭ i cikavostak. Moža heta i budzie prykładam dla astatnich, jašče narabić svaich «Śpieŭnych schodaŭ». My zadali ideju…Treba kab narod padchapiŭ i pačaŭ stvarać svajo», — zaŭvažaje Siarhiej.

Darečy, tak jano i jość — pad upłyvam ad prajektu Doŭhušava/Čubata stali ŭtvaracca lakalnyja «Śpieŭnyja schody». Naprykład, užo jość «Kurasoŭščynski Śpieŭny schod» i «Śpieŭny schod na Hiercena».

• 0
• 0
• 0
• 0
• 0
• 0
• 0
• 0