Fiermiera Kabanava, lidara bresckaha «Marša niedarmajedaŭ», pasadzili na 5 sutak, kab nie ŭznačaliŭ Marš u Pinsku

U sudzie Biarozaŭskaha rajona 9 sakavika razhladali adrazu try administratyŭnyja spravy suprać Alaksandra Kabanava, fiermiera, jaki ŭznačalvaŭ akcyi pratestu suprać Dekreta №3 u Breście.

Pavialičyć

Dźvie spravy byli źviazanyja z pratestami — Kabanava abvinavacili pa standartnych u takich vypadkach artykułach. Jon nibyta parušyŭ zakon ab masavych mierapryjemstvach, a taksama łajaŭsia matam.

Pra vypadak z łajankaj sam fiermier raspaviadaŭ, što jaho spravakavali — ranicaj kala jaho doma niejki mužčyna pačaŭ patrabavać u jaho cyharetu, paśla hrošy, a zatym sam abłajaŭ. Pa słovach Kabanava, toj ža mužčyna i napisaŭ zajavu ŭ milicyju, heta byŭ pravakatar, žychar Paŭnočnaha haradka Biarozy Syčyk. Śviedkami vystupili milicyjanty, što siadzieli ranicaj u mašynie la doma fiermiera. A ŭvohule spačatku Kabanava zabrali za parušeńnie pravił darožnaha ruchu, i tolki praz try hadziny vystavili abvinavačańnie ŭ łajancy.

Akramia taho, niepasredna 9 sakavika vyśvietliłasia, što razhledziać jašče adnu spravu. Raniej Kabanaŭ nie źjaviŭsia ŭ sud pa paviestcy.

Sam Alaksandr Kabanaŭ pierad pasiadžeńniem upeŭniena kazaŭ, što jaho zakryjuć na sutki.

«Upeŭnieny na 99% — daduć nie štraf, a aryšt», — ahučyŭ svoj prahnoz Alaksandr Kabanaŭ.

Pavialičyć

Milicyjanty, jakich vyklikali śviedkami, raspaviali što vinavaty Kabanaŭ: jon i łajaŭsia maciukami, i na sud nie źjaviŭsia nieviadoma čamu (sam fiermier śćviardžaje, što pakazvaŭ kvitki na ciahnik i papiaredžvaŭ, što nie zmoža prysutničać na tym pasiadžeńni).

Darečy, sam spadar Syčyk, jaki napisaŭ zajavu na Kabanava, na sud uvohule nie pryjšoŭ.

«Ja hramadzianin Respubliki Biełaruś, i mnie nie abyjakava, što adbyvajecca ŭ majoj krainie. Vy začytvali pakazańni milicyjanta — i tam było słova «natoŭp». Ale my narod, a nie natoŭp. My majem prava źbiracca. I my nie parušajem zakon, — skazaŭ sudździ Kabanaŭ pierad abviaščeńniem prysudu. — U nas dźvie katehoryi hramadzian: supracoŭniki milicyi i my, ludzi. Ja liču, što ŭsie pratakoły palityzavanyja z-za taho, što ja zajmajusia aktyŭnaj dziejnaściu».

Sudździa Natalla Vakulčyk vyrašyła, što Alaksandr Kabanaŭ vinavaty tolki ŭ parušeńni zakonu ab masavych mierapryjemstvach. Vakulčyk asudziła fiermiera na 5 sutak. Jon byŭ uziaty pad vartu ŭ zali suda.

Padtrymać abvinavačanaha pryjšli bolš za 20 čałaviek. Pryjechaŭ ź Minska i Anatol Labiedźka (Kabanaŭ — siabra Abjadnanaj Hramadzianskaj Partyi).

«Hańba!» — kryčali ludzi, kali Kabanava brali pad vartu.

Takim čynam, Alaksandr Kabanaŭ nie zmoža ŭziać udzieł ni ŭ adnym z «Maršaŭ niedarmajedaŭ», jakija majuć prajści ŭ subotu i niadzielu ŭ rajonnych haradach, u tym liku ŭ Pinsku.

• 0
• 0
• 0
• 0
• 0
• 0
• 0
• 0