Baćka i syn Kuźniečyki miesiac chavajucca ŭ šviedskim pasolstvie. Raskazvajem, jak im žyviecca
«My ni pra što nie škadujem», — kaža Uładzisłaŭ Kuźniečyk.
11 vieraśnia dvoje mužčyn pahrukalisia ŭ šviedskuju ambasadu, jakaja znachodzicca ŭ Minsku, i paprasili pradastavić im palityčny prytułak. Kali dźviery nie adčynili, mužčyny prosta pieraleźli cieraz płot ambasady.
Heta byli baćka i syn: 47-hadovy Vital i 29-hadovy Uładzisłaŭ Kuźniečyki ź Viciebska. Jany pajšli na taki niečakany ŭčynak, bo bajalisia zatrymańnia i kryminalnaha pieraśledu paśla sutyčki ź milicyjaj.
6 vieraśnia Kuźniečyki ŭdzielničali ŭ akcyi pratestu, jakaja prachodziła ŭ Viciebsku. Demanstrantaŭ žorstka zatrymlivali: Vitalu Kuźniečyku raspylili ślezaciečny haz u vočy.
Syn zdoleŭ jaho adbić, ale było zrazumieła, što paźniej buduć nastupstvy z boku siłavikoŭ. Tamu čatyry dni baćka i syn chavalisia, a paśla pajechali ŭ Minsk, spadziejučysia, što šviedy im dapamohuć.
Usio pajšło nie pa scenary, praŭda, šviedskija dypłamaty Kuźniečykaŭ usio ž nie vyhnali. 11 vieraśnia la ambasady dziažuryli siłaviki, ale im biełarusaŭ tak i nie addali. Pakul što dalejšy los Vitala i Uładzisłava nie vyrašany, jany praciahvajuć zastavacca na terytoryi ambasady. Tym časam 18 vieraśnia ŭ ich viciebskim domie prajšoŭ pieratrus.
11 kastryčnika spaŭniajecca miesiac, jak Vital i Uładzisłaŭ znachodziacca ŭ šviedskaj ambasadzie. Uładzisłaŭ, syn, raspavioŭ «Našaj Nivie» padrabiaznaści ich žyćcia.
«Žyviom z usimi patrebnymi vyhodami. Jość spalnyja miescy, duš, tualet. Z techniki — pralnaja mašynka, mikrachvaloŭka, elektryčny čajnik. Ježu nam prynosiać hatovuju — zastajecca tolki razahreć! Taksama dajuć sadavinu i harodninu! — raskazvaje Uładzisłaŭ. — Dla zaniatkaŭ sportam jość turnik, štanha, hiry.
Raskład dnia ŭ mianie prykładna nastupny. Pračnulisia — zaradka. Paśla śniadanak. Zatym čytajem, hladzim niezaležnyja ŚMI. Bałazie jość vychad u internet!
Paśla možam jaki sieryjał pahladzieć. Zatym abied. U 17:00 treniroŭka sa štanhaj, turnik hiry, adciskańni. U 19:00 viačerajem».
Televizara ci kampjutara ŭ ich pakoi niama, kaža chłopiec, tamu dla vychadu ŭ internet karystajucca tolki mabilnikami.
«Pra toje, što my apynulisia tut, ni škaduju ani ja, ani baćka, — zapeŭnivaje Uładzisłaŭ. — Svajaki nas taksama padtrymlivajuć. Maci kaža, što my pravilna ŭsio zrabili, i jana hanarycca mnoj, što ja zastupiŭsia za baćku! Tut my ŭ biaśpiecy! Lepš tut, čym być u turmie abo padvierhnucca katavańniam, padčas jakich mohuć i zabić!
Anałahičnaja pazicyja i ŭ majoj žonki!»
Pra toje, što budzie ź imi dalej, Uładzisłaŭ kazać pakul nie moža. Ale jon ŭpeŭnieny: ich nie addaduć biełaruskim siłavikam, chiba tolki Kuźniečyki sami zachočuć zdacca. Ale hetaha ŭ ich płanach pakul niama.
«Dla mianie samaje ciažkaje siońnia — pieražyvańni za siamju, za svaich dvaich dziaciej. Pakul hrašyma dapamahajuć siabry i znajomyja, dy i jość trochi źbieražeńniaŭ. Ale, kali ŭłada nie źmienicca, to pryjdziecca źjechać za miažu. Što tam rabić, kim pracavać — pra heta pakul nie dumali, bo chočacca, kaniečnie, zastacca ŭ Biełarusi, — kaža Uładzisłaŭ. — My vierym i spadziajemsia, što źmiena ŭłady ŭsio ž adbudziecca, ale zrazumieła, što heta budzie nie chutka. Kali biełaruski narod i cyvilizavanyja krainy nie pryznajuć siońniašniaha prezidenta, to pieramieny — heta pytańnie času. Dy i sankcyi nichto nie admianiaŭ».
Ciapier čytajuć
Apakalipsis zaŭtra. Statkievič napisaŭ pieršy artykuł — z papiaredžańniem pra niebiaśpieku z boku Rasii36
Apakalipsis zaŭtra. Statkievič napisaŭ pieršy artykuł — z papiaredžańniem pra niebiaśpieku z boku Rasii
U jakoj raźviedki była najlepšaja infarmacyja ź Biełarusi ŭ lutym 2022 i chto paviedamiŭ Budanavu, što asnoŭny ŭdar rasijan budzie na Hastomiel. Źjaviłasia vialikaja publikacyja2020
Kamientary