Kardyjołaha Volhu Karniejevu pakarali štrafam 5800 rubloŭ za kvietki kala miemaryjała Tarajkoŭskaha
Takoje rašeńnie vyniesła siońnia sudździa Maryja Jarochina.
56-hadovaja doktarka-kardyjołah Volha Karniejeva 16 maja kala 16.20 uskłała kvietki da narodnaha miemaryjała Alaksandra Tarajkoŭskaha. U hety momant da jaje adrazu padjechaŭ bus, adkul vyjšli kala siami supracoŭnikaŭ AMAPa, adzin ź jakich zdymaŭ usio na videa. Jaje zatrymlivali adrazu čaćviora supracoŭnikaŭ, nahadvaje spring96.org.
Volhu dastavili ŭ Frunzienskaje RUUS i skłali pratakoł za niesankcyjanavanaje pikietavańnie pa art. 24.23 KaAP. 17 maja spravu doktara razhladzieła sudździa Frunzienskaha rajona Maryja Jarochina.
Svaju vinu Karniejeva nie pryznała. Žančyna patłumačyła, što prachodziła mima miemaryjała i ŭbačyła, što na miescy hibieli mała kvietak, tamu spuściłasia ŭ pierachod i kupiła bukiet. Volha raspaviała, što heta staražytnaja słavianskaja duchoŭnaja tradycyja — kłaści kvietki na miesca hibieli čałavieka. Tamu jana prosta pakłała ich i pajšła dalej.
Sudździa Jarochina ŭdakładniła, ci znachodzicca na stancyi mietro «Puškinskaja» jakoje-niebudź pachavańnie. Karniejeva nahadała sudu, što na tym miescy zahinuŭ čałaviek.
Paśla čaho adbyŭsia nastupny dyjałoh Volhi z sudździoj Jarochinaj:
— Ci źjaŭlajecca blizkim svajakom asoba, pra jakuju Vy kažacie, jakaja zahinuła, pry abstavinach, pra jakija sudu nie viadoma, Vy nam nie patłumačycie?
— Sud viedaje hetyja abstaviny i bieź mianie. Jon mnie nie źjaŭlajecca blizkim svajakom. Jon prosta čałaviek. Prosta hramadzianin Respubliki Biełaruś.
— Raskažycie, pra kaho Vy kažacie.
— Pra Alaksandra Tarajkoŭskaha.
— Jakoje Vy majecie dačynieńnie da hibieli hetaha hramadzianina?
— Nijakaha.
— Možacie patłumačyć sudu svajo volevyjaŭleńnie?
— Mnie prosta pa-čałaviečy škada. U mianie humanitarnaja prafiesija — ja doktar. Mnie nie padabajecca, kali hinuć ludzi. Ja šanuju pamiać zahinułych, tamu i pakłała tudy kvietki.
Volha Karniejeva zajaviła, što śviedka-milicyjant, jaki pryjšoŭ u sud, nie prymaŭ udzieł u jaje zatrymańni, bo zatrymlivali jaje supracoŭniki AMAPa. Pa jaho słovach, akramia ŭskładańnia kvietak, Volha jašče i ŭzdymała ruku ŭvierch kala darohi, kab pryciahnuć uvahu kiroŭcaŭ.
Sudździa Maryja Jarochina vyrašyła zrabić u spravie Karniejevaj pierapynak da 18 maja, a siońnia pakarała štrafam 200 bazavych (5800 rubloŭ).
-
Ministr adukacyi raskazaŭ, chto budzie adkazvać za zachavanaść mabilnikaŭ, jakija buduć zabirać u školnikaŭ
-
Bajkier z chvastom. Brescki džek-raseł na matacykle staŭ zorkaj TikTok
-
U Ofisie Cichanoŭskaj pracuje vykładčyk z Danii. Jon raskazaŭ, čamu kinuŭ kamfortnaje žyćcio i zaniaŭsia biełaruskaj spravaj
Ciapier čytajuć
U Ofisie Cichanoŭskaj pracuje vykładčyk z Danii. Jon raskazaŭ, čamu kinuŭ kamfortnaje žyćcio i zaniaŭsia biełaruskaj spravaj7
Kamientary