Łukašenka: Budziem prasić mihrantaŭ viarnucca nazad, patracili na ich $25 miljonaŭ
Biełaruś budzie prasić mihrantaŭ, jakija znachodziacca na miažy, viarnucca nazad, ale chapać i vyvozić siłaj nikoha nie buduć. Ab hetym Łukašenka zajaviŭ u intervju prapahandystu Dźmitryju Kisialovu.
Biełaruski palityk nahadaŭ, što kali havaryŭ pa telefonie z Anhiełaj Mierkiel, to jana paprasiła jaho zaniacca repatryjacyjaj hetych ludziej. «Ja kažu: viedajecie, Anhieła, takimi žorstkimi słovami davajcie nie budziem navat havaryć, — raskazaŭ Łukašenka. — Heta značyć, chapaj adsiul i vyvoź siłaj. Ja joj adrazu skazaŭ, u kancy ŭžo, dvojčy paŭtaryŭ: ja budu staracca vyrašyć hetuju prablemu da Novaha hoda, tamu što jana nam nie patrebnaja. Ludzi boŭtajucca to ŭ Minsku, u Hrodnie i inšaje. Viedajecie, jak reahuje nasielnictva. My budziem prasić hetych ludziej, jakija zakonna ŭ nas znachodziacca pa turystyčnaj vizie ŭ haścinicy i inšaje, kab jany viarnulisia nazad, tamu što humanitarnaha kalidora nie budzie. I ja ŭžo bolš za tysiaču viarnuŭ ich u Irak, ale ja joj prapanavaŭ voś hetych».
Palityk adznačyŭ, što evakuacyjnyja rejsy byli apłačanyja Irakam. Biełaruś ža ŭžo patraciła na ŭtrymańnie biežancaŭ (Łukašenka nazyvaje biežancami mihrantaŭ na biełaruska-polskaj miažy — zaŭv. Red.), pavodle danych tolki tydniovaj daŭnaści, $12,5 młn. «Ciapier heta budzie ŭ dva razy bolš», — zajaviŭ Alaksandr Łukašenka.
«Heta značyć, uvieś dohlad, charčavańnie, abahravańnie, lačeńnie…» — udakładniŭ Dźmitryj Kisialoŭ.
«Absalutna», — paćvierdziŭ Łukašenka.
«Suśvietnaja arhanizacyja achovy zdaroŭja prysłała niejkija tam pančochi, prakładki, pampiersy ci jašče niešta takoje», — dadaŭ biełaruski palityk.
Kamientary