«Hledziačy ŭ kryvoje lusterka, my krainy nie ŭtrymajem». Łukašenka zajaviŭ, što ŭrad jamu chłusić. Heta nie pieršaja ataka na Hałoŭčanku
Alaksandr Łukašenka na siońniašniaj naradzie pa pytańniach stratehičnych prajektaŭ abvinavaciŭ urad u dezynfarmacyi.
«Nie zaŭsiody, pryniaŭšy rašeńnie, my jaho realizujem. Realizujem nie ŭ čas — heta ŭžo norma. Ale mianie bolš za ŭsio apošnim časam (ja ŭžo pra heta dzieści kazaŭ) chvaluje toje, što naš urad zamiest taho, kab kankretnaj spravaj zajmacca, pačynaje chłusić i dezynfarmavać prezidenta. Dla taho kab pakazać siabie ŭ lepšym śviatle», — cytuje Łukašenku BiełTA.
«Ja nie chaču publična pryvodzić prykłady, ale ŭ zakrytym režymie ja pryviadu vam prykład, jaki krasamoŭna śviedčyć ab tym, što chłuśnia ŭ nas nie zžytaja. I ździŭlacca tamu, što ŭ nas u Homielskaj vobłaści hibiel bydła (prypisvajuć tam dzieści), u Viciebskaj vobłaści, Mahiloŭskaj, dyj naohuł pa krainie… Što tut ździŭlacca, kali heta idzie ad ministraŭ našych, ad našych hubiernataraŭ. Heta niedapuščalna», — aburyŭsia Łukašenka.
Jon padkreśliŭ, što ŭźniknieńnie takich situacyj — heta krajni vypadak.
«Ja nie kažu, što heta tradycyja. Ale ja bajusia, kab heta nie stała ŭ Biełarusi tradycyjaj — chłuśnia.
Hledziačy ŭ kryvoje lusterka, my krainy nie ŭtrymajem. I novych impulsaŭ joj nie nadadzim, jakija b stratehičnyja ŭ nas płany ni isnavali», — zajaviŭ Alaksandr Łukašenka.
Łukašenka rehularna krytykuje ŭrad, tak było ŭvieś čas jaho prezidenctva.
Naprykład, 14 lutaha 2023 hoda Łukašenka krytykavaŭ siabroŭ urada za «kiepskuju raspracoŭku» šerahu važnych rašeńniaŭ. Tady Łukašenku prezientavali prajekty dakumientaŭ, jakija datyčać pašyreńnia funkcyj centraŭ absłuhoŭvańnia biudžetnych arhanizacyj, finansavańnia dziaržaŭnych teatraŭ. A taksama jakija datyčacca miechanizma dałučeńnia nizkaefiektyŭnych sielhasarhanizacyj da dziaržpradpryjemstvaŭ.
Adnak pa kožnym z pytańniaŭ Łukašenka stroha krytykavaŭ.
Na naradzie 3 kastryčnika premjer Raman Hałoŭčanka taksama trapiŭ pad krytyku.
«Ź jakoj efiektyŭnaściu my pracujem na kalijnym rynku? Asabliva pa debitorskaj zapazyčanaści? My vyrablajem nie tolki kalijnyja ŭhnajeńni, ale i azotnyja dy fosfarnyja […]. Niekali my zamachvalisia, što stvorym adzinuju mahutnuju kampaniju, jakaja budzie zajmacca. Heta, Raman Alaksandravič [Hałoŭčanka], tak u vašym uradzie i patanuła ideja. Usio nam štości zaminaje. Moža, nie tolki vam. […] Kamuści nie chočacca, ci jašče niejkija pytańni pieraškadžajuć?» — aburyŭsia dva tydni tamu Łukašenka.
Na toj naradzie prahučali takija notki, jakija dazvalajuć zrabić vysnovu, što ŭ Alaksandra Łukašenki jość ideja ab nieabchodnaści pradavać usie biełaruskija ŭhnajeńni praz pasiarednictva niejkaj adnoj struktury, a Hałoŭčanku Łukašenka ŭpiknuŭ u niedamovazdolnaści.
Čytajcie taksama: Zdajecca, Łukašenka źbirajecca azałacić niekaha na ŭhnajeńniach. Hałoŭčanka sprabavaŭ pieraškodzić
Ciapier čytajuć
Na pieradśmiarotnym videa z kałonii nasamreč byŭ nie Vitold Ašurak. Źjavilisia novyja padrabiaznaści śmierci palitviaźnia6
Kamientary