Hiensak NATA zaklikaŭ členaŭ aljansu ihnaravać jadziernyja pahrozy Pucina
Hienieralny sakratar NATA Mark Rute miarkuje, što dziaržavy Aljansu nie pavinny bajacca jadziernych pahroz, jakija praktykuje rasijski lidar Uładzimir Pucin u sprobie asłabić vajskovuju dapamohu Ukrainie z boku Zachadu.
Na pytańnie, ci varta sajuźnikam pa NATA źviartać uvahu na rasijskaje «brazhańnie jadziernaj zbrojaj», Rute adkazaŭ, što nie.
«Nie, nie varta, dy jany i nie źviartajuć», — skazaŭ Mark Rute, jakoha cytuje Sky News.
Pavodle słoŭ hiensaka Aljansu, jadziernyja vučeńni krain NATA Steadfast Noon, jakija pačynajucca na nastupnym tydni, prademanstrujuć hatoŭnaść arhanizacyi adkazać na pahrozy Kramla.
«NATA mocnaja. My možam supraćstajać lubomu supierniku. U nas jość usio nieabchodnaje, kab harantavać biaśpieku NATA, supraćstajać luboj pahrozie. I nas nikoli nie zapałochajuć krainy, jakija nie ŭvachodziać u NATO, jakija sprabujuć nam pahražać. Heta bieskarysna, chaj jon (Pucin) lepš spynić heta rabić», — padkreśliŭ Mark Rute.
Taksama jon źviarnuŭ uvahu na toje, što ciapier važna, kab krainy praviarali i ŭmacoŭvali abaronu.
«My taksama jasna dali zrazumieć našym praciŭnikam, što hatovyja adkazać na lubuju pahrozu», — dadaŭ jon.
Z paniadziełka, 14 kastryčnika, NATA pačnie svaje štohadovyja jadziernyja vučeńni Steadfast Noon. Raniej Mark Rute ŭžo zaklikaŭ nie słuchać jadziernyja pahrozy Rasii i padkreśliŭ, što sajuźniki ciapier nie bačać pramych ryzyk prymianieńnia jadziernaj zbroi.
Adkazvajučy na pytańnie, ci nie asłablaje Ukrainu toje, što sajuźniki, takija jak Vialikabrytanija i ZŠA, dahetul nie dali dazvołu Kijevu na vykarystańnie svaich dalnabojnych uzbrajeńniaŭ, naprykład, kryłatych rakiet Storm Shadow, suprać celaŭ na terytoryi Rasii, kiraŭnik NATA skazaŭ: «Ja nie ŭpeŭnieny, što heta tak».
«Kab być absalutna zrazumiełym: hałoŭnaje pytańnie tut zaklučajecca ŭ tym, kab vajskovaja dapamoha praciahvała pastupać va Ukrainu, kab my naroščvali taksama pramysłovuju vytvorčaść va Ukrainie, dapamahali im z hetaj masiŭnaj łahistykaj. Adna sistema ŭzbrajeńniaŭ nie źmienić zychod vajny», — miarkuje Rute.
Ciapier čytajuć
Žychary Hrušaŭki i Michałova zastajucca biez deputatki: čempijonka Mirončyk-Ivanova źbirajecca ŭ dekret18
Kamientary