Šviedy pradali mabilnaha raspracoŭščyka ź biełaruskimi karaniami bolš čym za miljard dalaraŭ
Raspracoŭščyk mabilnych kazualnych hulniaŭ rodam ź Biełarusi Easybrain znoŭ staŭ abjektam M&A ździełki. U pačatku 2021 hoda jaho kupiła šviedskaja kampanija Embracer Group za 640 miljonaŭ dalaraŭ. Zaraz jana pradała aktyŭ — udvaja daražej, piša Devby.io.
Šviedski chołdynh Embracer Group abviaściŭ pra ŭhodu pa prodažy Easybrain šviejcarskamu pablišaru mabilnych hulniaŭ Miniclip. Suma ŭhody — 1,2 miljarda dalaraŭ.
U vyniku čysty doŭh šviedskaj kampanii (13,2 miljarda šviedskich kron, abo 1,2 miljarda dalaraŭ) źnizicca da 0,5 miljarda kron (45,3 miljona dalaraŭ), havorycca ŭ relizie.
Čakajecca, što ŭhoda budzie zakrytaja ŭ pačatku 2025 hoda.
«Hetaja tranzakcyja źmianiaje finansavaje stanovišča Embracer, staviačy nas u bolš mocnuju pazicyju dla rostu koštu», — zajaviŭ suzasnavalnik i CEO Embracer Łars Vinhiefors.
Miniclip — šviejcarski vydaviec mabilnych hulniaŭ, na rynku z 2001 hoda. U lutym 2015 hoda staŭ častkaj kitajskaj technałahičnaj karparacyi Tencent.
Easybrain prabyŭ u składzie Embracer Group krychu mienš za čatyry hady. Šviedski chołdynh nabyŭ mabilnaha raspracoŭščyka ŭ lutym 2021 hoda za 640 miljonaŭ dalaraŭ. Heta tady stała padziejaj dla biełaruskaj IT-supolnaści: za kaleh radavalisia i abmiarkoŭvali, čamu šviedy nie spałochalisia palityčnych ryzyk. Jak minimum hod paśla hetaha ŭsio jašče išło dobra: Easybrain była samym prybytkovym padraździaleńniem u šviedskim chołdynhu, i sam chołdynh naroščvaŭ prodažu.
Ale potym, vidavočna, situacyja pamianiałasia. U pačatku 2024 hoda Embracer Group akazałasia ŭ topie pa kolkaści zvolnienych supracoŭnikaŭ.
***
Easybrain — raspracoŭščyk mabilnych hulniaŭ, śpiecyjalizujecca na hałavałomkach i łahičnych hulniach. Kolkaść supracoŭnikaŭ na pačatak 2024 hoda — 340 čałaviek. Štab-kvatera znachodzicca ŭ Limasole (Kipr), pa-raniejšamu jość ofis raspracoŭki ŭ Minsku.
Zasnavalniki kampanii — Piotr Skaromny, Maćviej Cimašenka i Aleh Hruševič.
Pa vynikach 2020 hoda Easybrain uvajšła ŭ top-3 samych papularnych biełaruskich raspracoŭščykaŭ, pa danych Sensor Tower. Hulni i prahramy kampanii karystalniki spampavali 328 miljonaŭ razoŭ (+75% da 2019 hoda).
Pa stanie na luty 2021 hoda hulni Easybrain mieli 750 młn ustanovak i 12 młn karystalnikaŭ u dzień. Partfolia ŭklučaje Sudoku.com, Nonogram.com, u 2020 hodzie ŭ im źjavilisia Art Puzzle, Killer Sudoku, Nonogram.com Color. U pačatku 2021 hoda kampanija pracavała z 15 hulniami.
Kamientary