Rasija nie maje šancaŭ u sutyknieńni ź Jeŭropaj. Ale ź dźviuma ŭmovami

Jak piša The Wall Street Journal, členy NATA zajaŭlajuć, što praź niekalki hadoŭ Rasija moža nazapasić siły dla bolš tradycyjnaha nastupu na Jeŭropu, asabliva kali mirnaje pahadnieńnie z Ukrainaj dazvolić Maskvie adnavić svaje ŭzbrojenyja siły. Pytańnie ŭ tym, ci zmoža rasijskaja armija zachapić jeŭrapiejskija terytoryi.

Ekśpierty NATA ličać, što ŭ Jeŭropy dobryja šancy ŭ patencyjnym kanflikcie z Rasijaj, u tym liku z-za charaktaru mahčymaha sutyknieńnia: havorka idzie pra rasijski napad na Jeŭropu. U samoj Jeŭropy niama płanaŭ napadać na Rasiju. Abarona terytoryi zaŭsiody praściejšaja, čym jaje zachop, što try hady tamu pakazali navat słaba ŭzbrojenyja ŭkrainskija vojski, spyniŭšy nastup Rasii na Kijeŭ.

Pieršy vyklik: SPA i raźviedka

U toj ža čas ekśpierty adznačajuć niedachopy jeŭrapiejskich uzbrojenych sił. Jany zaležać ad ZŠA ŭ pytańniach raźviedki, nazirańnia i rekahnascyroŭki, transpartnaj avijacyi, sistemy kiravańnia i kantrolu vajennych apieracyj. Mahčyma, najbolš uraźlivym miescam źjaŭlajecca niedachop efiektyŭnaj sistemy supraćpavietranaj abarony.

Tym nie mienš abjadnanyja ŭzbrojenyja siły ŭjaŭlajuć saboj mahutnyja VPS, vielizarny fłot i značnuju pa kolkaści armiju. Suchaputnyja vojski, jakija paśla zakančeńnia chałodnaj vajny značna skaracilisia, ciapier pastupova adnaŭlajucca i papaŭniajucca sučasnaj technikaj.

Viasnoj minułaha hoda 32 krainy NATA praviali najbujniejšyja z časoŭ chałodnaj vajny vučeńni z udziełam kala 90 000 vajskoŭcaŭ, bolš čym 80 samalotaŭ i 1 100 bajavych mašyn, značnaja častka jakich prybyła z ZŠA. U 2025 hodzie zapłanavana kala 100 asobnych vučeńniaŭ.

Vučeńni dapamahajuć vojskam pryvyknuć da bajavych dziejańniaŭ u kaardynacyi z sajuźnikami, a kamandziram — kiravać šmatnacyjanalnymi padraździaleńniami. Taksama jany trenirujuć siaržantaŭ i staršyn, jakija kirujuć padraździaleńniami ŭ bai, prymać rašeńni va ŭmovach stresu i chutkich źmien.

Pavialičyć

Jeŭrapiejskija armii vałodajuć značnymi zapasami techniki, choć daloka nie ŭsia jana znachodzicca ŭ stanie poŭnaj bajavoj hatoŭnaści. Pavodle źviestak Mižnarodnaha instytuta stratehičnych daśledavańniaŭ (IISS), u rasparadžeńni Jeŭropy kala 5 000 tankaŭ i bolš za 2 800 samachodnych artyleryjskich ustanovak.

U Rasii, pavodle źviestak z adkrytych krynic, moža zastacca da 3 000 tankaŭ, choć realnuju kolkaść acanić składana paśla značnych strat va Ukrainie. Pa kolkaści samachodnaj artyleryi Rasija sastupaje Jeŭropie ŭdvaja.

Adnak źjaŭleńnie dronaŭ źniziła efiektyŭnaść takich sistem, a Rasija stała suśvietnym lidaram u raspracoŭcy bieśpiłotnikaŭ. U adkaz krainy NATA aktyŭna vyvučajuć ukrainski dośvied i stvarajuć ułasnyja ŭdarnyja i supraćdronavyja technałohii.

U śfiery tradycyjnaj avijacyi krainy NATA ŭ Jeŭropie majuć kala 2 000 źniščalnikaŭ i inšych bajavych samalotaŭ. Jeŭrapiejcy aktyŭna pašyrajuć i madernizujuć hety park. Da 2030 hoda ŭ ich budzie bolš za 500 pieradavych amierykanskich źniščalnikaŭ F-35.

Rasija maje prykładna 1 000 bajavych samalotaŭ, uklučajučy bambardziroŭščyki i šturmaviki. Adnak, pavodle źviestak IISS, u bai jany pakazali siabie nieefiektyŭna, i kala 20% adpraŭlenych na front mašyn było źniščana.

U toj ža čas zachodnija čynoŭniki aścierahajucca, što ŭ vypadku spynieńnia bajavych dziejańniaŭ Rasija chutka adnović svaje ŭzbrojenyja siły. Jeŭrapiejskija krainy vyčarpali svaje zapasy ŭzbrajeńnia, pieradajučy ich Ukrainie, i ciapier sutykajucca ź ciažkaściami pry ich adnaŭleńni.

«Naša abaronnaja pramysłovaść pa-raniejšamu zanadta małaja, zanadta razdroblenaja i, kali ščyra, zanadta marudnaja», —

cytuje vydańnie niadaŭniuju zajavu hienieralnaha sakratara NATA Marka Rute ŭ Jeŭraparłamiencie.

Pavialičyć

Lidary ES terminova šukajuć finansavańnie dla pavieličeńnia vytvorčaści vajennaj techniki. Cisk z boku Trampa nadaŭ hetym namahańniam dadatkovuju terminovaść.

Druhi vyklik: hatoŭnaść dziejničać biez ZŠA

Jak Jeŭropa budzie vieści vajnu biez udziełu ZŠA — novaje pytańnie dla krain NATA. Choć jeŭrapiejskija inviestycyi ŭzmocniać abaranazdolnaść kantynienta, ciapierašniaja sistema bajavoha płanavańnia i kamandavańnia NATA pieršapačatkova raźličana na ŭdzieł ZŠA.

Akramia NATA, u Jeŭropy niama adzinaha vajennaha kamandavańnia. ZŠA dziesiacihodździami błakavali sproby jeŭrapiejskich sajuźnikaŭ stvaryć alternatyŭnyja vajennyja struktury. Niahledziačy na rehularnyja razmovy pra stvareńnie ahulnajeŭrapiejskich sił, značnaha prahresu ŭ hetym napramku nie nazirajecca.

Ciapier jeŭrapiejcy zadumvajucca pra kalektyŭnuju abaronu biez padtrymki ZŠA. Adpraŭnym punktam mohuć stać dziejučyja nataŭskija płany, jakija možna adaptavać pad najaŭnyja siły, ličać pradstaŭniki aljansu.

Hetyja płany zasakrečanyja, ale ich asnova zastajecca niaźmiennaj z časoŭ chałodnaj vajny: strymlivać rasijskaje nastupleńnie siłami, što znachodziacca ŭ Jeŭropie, pakul nie prybuduć padmacavańni z ZŠA.

Pavodle słoŭ ekśpiertaŭ, navat biez amierykanskaha ŭdziełu Jeŭropa moža vykarystoŭvać nataŭskija stratehičnyja napracoŭki jak asnovu dla svajoj abarony. Adnak dla papaŭnieńnia deficytu ŭzbrajeńniaŭ i ŭzmacnieńnia armii joj daviadziecca značna pavialičyć vydatki na madernizacyju.

• 14
• 1
• 3
• 4
• 1
• 0
• 0
• 1