Novy kiraŭnik fondu Mielnikavaj moža atrymać dostup da rachunkaŭ ciaham niekalkich tydniaŭ

Z krasavika zasnavany Anžalikaj Mielnikavaj fond «Białoruś Liberty» ŭznačaliŭ Vital Paciechin. Z taho momantu minuŭ amal miesiac, adnak dostupu da rachunkaŭ arhanizacyi dasiul niama, skazała «Biełsatu» staršynia nahladnaj rady fondu, pradstaŭnica «Kibierpartyzanaŭ» Julijana Šamietaviec: «Jon byŭ pryznačany tolki ŭ adnoj sistemie, paśla treba było taksama mianiać u inšych. Plus jon adsutničaŭ, byŭ u płanavaj pajezdcy, i pieršy raz pajšoŭ u bank na minułym tydni».

Jak skazała Šamietaviec, asablivych prablemaŭ tut niama: «zvyčajnaja biurakratyja, dyj vychodnyja».

Jana kaža, što dostup da rachunkaŭ źjavicca ŭ chutkim časie: «Spadziajusia, ciaham najbližejšych tydniaŭ».

Raniej krynica «Biełsatu» ŭ MZS Polščy kazała, što hrošy z rachunkaŭ fondu byli źniatyja. Praŭda, nieviadoma, chto heta zrabiŭ: ci sama Mielnikava, ci niechta inšy, a kali Mielnikava — to ci dobraachvotna, ci pad prymusam.

Raniej u arhanizacyju pryjšoŭ hrant dla Kaardynacyjnaj rady, kala 100 tysiač jeŭra. Akramia taho, praz hety fond dapamohu ad donaraŭ atrymoŭvali «Kibierpartyzany», na rachunku było«niekalki dziasiatkaŭ tysiač dalaraŭ» na «Partyzanski Telehram», na mieniedžmient i raźvićcio bazaŭ źviestak.

Pra źniknieńnie śpikierki Kaardynacyjnaj rady Anžaliki Mielnikavaj jaje kalehi paviedamili ŭviečary 28 sakavika. U zajavie Paŭła Łatuški havaryłasia, što suviaź adsutničaje z 25 sakavika, adnak havorka idzie pra anłajn-kamunikacyju. Nasamreč Mielnikavu ŭžyvuju nie bačyli ŭžo daŭnym-daŭno. Paźniej stała viadoma, što Anžalika Mielnikava pakinuła terytoryju Jeŭrasajuza 26 lutaha, a jaje były muž źjechaŭ z Polščy ŭ Biełaruś 3 sakavika.

7 krasavika žurnalistam «Lusterka» ŭdałosia parazmaŭlać z byłym mužam Anžaliki Mielnikavaj, jaki paćvierdziŭ, što znachodzicca ŭ Biełarusi, a dzieci — pry im. Baćki Mielnikavaj u razmovie z žurnalistam «Jeŭraradyjo» taksama paćvierdzili, što dzieci znachodziacca ŭ Biełarusi, a pra miescaznachodžańnie samoj Anžaliki jany sami ničoha nie viedajuć i tryvožacca.

8 krasavika vice-śpikierka Kaardynacyjnaj rady Stanisłava Hlińnik, jakaja ciapier vykonvaje abaviazki śpikierki, paviedamiła, što 13 sakavika z akaŭnta Anžaliki Mielnikavaj byli spampavanyja fajły, da jakich jana mieła dostup u ramkach pracy Kaardynacyjnaj rady. Siarod ich — stratehičny płan, biudžet, unutranyja dakłady i inšyja apieracyjnyja materyjały pačynajučy ź lipienia 2024 hoda.

10 krasavika telekanału «Biełsat» stała viadoma, što z rachunka fondu Białoruś Liberty, zasnavanaha Anžalikaj Mielnikavaj, źniali hrošy. Zrabiła heta jana sama ci chto inšy, pakul nieviadoma. 

14 krasavika stała viadoma, što rasśledavańnie źniknieńnia Anžaliki Mielnikavaj u Polščy pieraviali na bolš vysoki ŭzrovień — zamiest Varšaŭskaj akruhovaj prakuratury hetym budzie zajmacca Nacyjanalnaja prakuratura. Na dumku śledčych, spravu pavinny rasśledavać prakurory, jakija zajmajucca najbolš važnymi spravami, u tym liku pytańniami špijanažu.

• 0
• 0
• 0
• 1
• 0
• 0
• 0
• 0