Bundestah nazvaŭ vybary ŭ Biełarusi cyničnaj insceniroŭkaj

Niesvabodnymi i niespraviadlivymi nazvali deputaty ŭsich frakcyj niamieckaha bundestaha parłamienckija vybary ŭ Biełarusi.

Abmierkavańnie biełaruskaha pytańnia adbyłosia 26 vieraśnia pa inicyjatyvie kirujučaj kaalicyi ŭ składzie chryścijanskich i svabodnych demakrataŭ, paviedamlaje pres-słužba bundestaha. Na dumku deputataŭ,

razmova idzie pra «cyničnuju insceniroŭku», «nasille», «zapužvańnie» i «dekaratyŭny parłamient», dzie niama nivodnaha pradstaŭnika apazicyi.

Frakcyi abmierkavali pierśpiektyvy dalejšaj palityki ŭ dačynieńni da Biełarusi: uzmacnieńnie sankcyj abo pavieličeńnie adkrytaści ŭ dačynieńni da biełaruskaha hramadstva.

Na dumku deputata Svabodnaj demakratyčnaj partyi Patryka Kurta, hałasavańnie ŭ Biełarusi supiarečyła ŭsim asnovam demakratyčnych vybaraŭ. «Sfalsifikavana ŭsio, što možna było sfalsifikavać», — zajaviŭ jon. Na dumku deputata, biełaruski režym jašče raz pakazaŭ, što nasille i zapužvańnie źjaŭlajucca jaho vizitnymi kartkami.

Aficyjny pradstaŭnik apazicyjnaj frakcyi Sacyjał-demakratyčnaj partyi pa źniešniaj palitycy Rolf Miutcenich zapatrabavaŭ vyzvaleńnia ŭsich palitźniavolenych u Biełarusi. U jakaści prykładu jon pryvioŭ sacyjał-demakrata Mikałaja Statkieviča, jaki bałatavaŭsia na prezidenckich vybarach 2010 hoda, byŭ aryštavany ŭ dzień vybaraŭ i na padstavie «sumniŭnaha pryhavoru» praciahvaje znachodzicca ŭ turmie. Na dumku Miutcenicha, u vypadku ź Biełaruśsiu nieabchodny ŭdzieł Rasii, jakaja robić vialiki ŭpłyŭ na Minsk. Rasijskamu ŭradu nieabchodna dakładna dać zrazumieć, što ŭ Biełarusi jon stavić na tych, kaho «daŭno abahnała historyja».

Namieśnik aficyjnaha pradstaŭnika frakcyi CHDS-CHSS pa źniešniaj palitycy Karł-Hieorh Vielman zajaviŭ ab «jeŭrapiejskaj trahiedyi»: režym Łukašenki ŭpuściŭ čas pravieści reformy i pryvieści krainu ŭ «jeŭrapiejskuju sučasnaść».

Kaleha Vielmana z frakcyi Levaj partyi Volfhanh Hierkie zaklikaŭ da maksimalnaj adkrytaści ŭ dačynieńni da biełaruskaha hramadstva. U hetym kantekście jon zaklikaŭ zhadzicca z praviadzieńniem u Biełarusi čempijanatu śvietu pa chakiei-2014. «Kali mumija apyniecca na pavietry, jana rassyplecca», — zajaviŭ jon, majučy na ŭvazie režym u Minsku.

Deputat frakcyi Sajuz-90/Zialonyja Vijoła fon Kraman-Taŭbadel nazvała zabiurakratyzavanaj praceduru atrymańnia biełarusami šenhienskich viz, a sami vizy dla bolšaści hramadzian krainy zanadta darahija.

• 0
• 0
• 0
• 0
• 0
• 0
• 0
• 0