Piać faktaŭ pra Paŭła Łatušku

Ministr kultury Pavieł Łatuška pryznačany pasłom u Francyi. Va ŭradzie bolš nie zastałosia biełaruskamoŭnych ministraŭ.

1. Samy małady

Byŭ samym junym ministram i ŭvohule najmałodšym siarod top-čynoŭnikaŭ. Zaniaŭ hetuju pasadu ŭ 36 hadoŭ. Pierad tym pracavaŭ pasłom Biełarusi ŭ Polščy.

Jon byŭ i adzinym biełaruskamoŭnym ministram — ad maładości, nie tolki na pasadzie, — chacia na naradach u Łukašenki, jakija pakazvali pa telebačańni, havaryŭ tolki pa-rasiejsku.

2. Žyvie ŭ Ždanovičach

Mała chto viedaje, što Pavieł Łatuška žyvie ŭ Ždanovičach. Šmatlikija ministry atabarylisia ŭ Drazdach i da taho padobnych prestyžnych kvartałach, a Łatuška zbudavaŭ nievialiki damok z mansardaj u byłym rabočym pasiołku ź jaho raźbitymi vulicami i zavalenymi śmietnicami. Praŭda, miascovaja ŭłada adrazu ž pakłała na Łatuškavaj vulicy asfalt. I navat bardziury — zdajecca, heta adzinaja vułka z bardziurami ŭ hetaj častcy Ždanovič.

3. Byŭ u abojmie, ale zastupiŭsia za «Pałac»

Pry Łatušku Ministerstva kultury raspracavała prahramu «Zamki Biełarusi». Zhodna ź joj, za 2012–2018 płanavałasia adnavić, da prykładu, Stary zamak u Hrodnie, zamki ŭ Lidzie i Lubčy, Sapiehaŭski pałac u Ružanach, zakansiervavać ruiny inšych znakavych zamkaŭ.

Ź inšaha boku, pry im ža ŭpraŭleńnie ideałohii adnaviła «čornyja śpisy» dziejačaŭ kultury: muzykaŭ, piśmieńnikaŭ. Sam ministr admaŭlaŭ ich najaŭnaść. Ale kali ŭ kastryčniku Teatr biełaruskaj dramaturhii admianiŭ užo praanansavany kancert hurtu «Pałac», Łatuška zatelefanavaŭ dyrektaru. I vystup adbyŭsia.

U skandał Łatuška trapiŭ padčas adboru na «Jeŭrabačańnie-2011», kali pieramožcaj była pryznačanaja Alona Łanskaja, a papraŭdzie pieramoh hurt «Łajtsaŭnd». Vinu ŭskłali ŭrešcie na strełačnika z Teleradyjokampanii.

4. Patrabavaŭ biełaruskaje piva

«Heta nie skarha. Ale prašu prainfarmavać, čamu ŭ Vašaj kaviarni nie pradajecca biełaruskaje piva…», — taki zapis pakinuŭ ministr kultury ŭ knizie zaŭvah i prapanovaŭ u staličnym «Ńjus-kafe» ŭ 2009-m. Biełaruskaje piva z toj pary stała prysutničać u hetaj kaviarni dla centravoha bamondu, i navat u asartymiencie.

5. Čaroŭnaja błandzinka

Pra asabistaje žyćcio Łatuški viadoma mała. Ale tabłoidy paviedamlali, što jon u razvodzie, i adznačali, što dačka-pryhažunia hadavałasia pry im. Niaredka jon ź joj źjaŭlaŭsia na kancertach. Ź joj ža valsavaŭ na niadaŭnim bali ŭ Niaśvižskim pałacy.

Apošnija hady Łatuška staŭ źjaŭlacca na publicy z čaroŭnaj błandzinkaj.

• 0
• 0
• 0
• 0
• 0
• 0
• 0
• 0