Як кажуць у чатах: IMXO.
«Странник М» — сольны праект былога лідэра вельмі стылёвай менскай групы «Thank You Jesus» Улада Благуша. Тады ён сьпяваў на ангельскай мове, цяпер па-расейску. Як кажуць у чатах: IMXO. Што было зроблена некалі на ангельскай, падабалася мне значна больш.
Аднак… «Thank You Jesus» разьбегліся па эміграцыях і калектывах, Улад дамовіўся з найлепшымі музыкамі краіны (К.Гарачы, В.Башкоў, К.Шавандо, С.Мядзьведзеў, Ю.Глушыцкая, І.Люты, Д.Хаменка і інш.), у выніку чаго паўстаў гэты альбом. Запісаны ён быў задоўга да ўкраінскага Майдану, а таму ніякага дачыненьня да перамогі Юшчанкі ня мае.
Мае ўражаньні: калі б не было Шадзька зь ягонай «Сестрой», «Странник М» мог бы прэтэндаваць на іхняе месца. Тут і падабенства музыкаў, якія ўдзельнічалі ў запісе, і падабенства музычна-паэтычнае ідэалёгіі, стылістыкі. Сьпелая, годная праца, стылёва вытрыманая і ўраўнаважаная. Не для шырокай публікі. Для той, якая жадае зьместу, а ня формы; настрою, а не фармату. Не для вялікай залі, а для клюбу, дзе слухачы і выканаўцы — вочы ў вочы, дзе няма сумневу, фанаграма гэта ці сапраўдныя сьпевы.
Таму ў сучаснай рэальнасьці — аніякага камэрцыйнага посьпеху. Асалода для жыхароў «хрушчовак», якія своечасова абарвалі правады радыёкропак і таму ня чуюць на кухні «ўсяго гэтага» — накшталт «Скрыгатаньняў Эўропы». Хоць многія песьні з гэтага альбому ўпісваюцца ў стылістыку поп-року і маглі б змагацца за ўяўныя прызы на тэлевізійным бэст-фэстывалі.
Арыгінальна і з густам зроблена. Пачакаем наступнага альбому, які ўжо на падыходзе.
Але «Thank You Jesus» было ўсё ж больш яскравае…
ІМХО-Слухач
Цяпер чытаюць
Ігар Тур з жонкай пасяліўся ў лукашэнкаўскім эксперыментальным пасёлку. Каб метр яму абышоўся танней, усе камунікацыі аплацілі з бюджэту5
Каментары