Аглядальнік «Советской Белоруссіі»: На Алімпіядзе расійскіх спартсменаў абсвіствалі
Ток-шоу «Справа прынцыпу» на тэлеканале АНТ 5 верасня было прысвечанае вынікам Алімпіяды ў Рыа-дэ-Жанейра. Госці перадачы палічылі, што Беларусь дастойна выступіла на Гульнях.
Была закранутая тэма допінгу, а таксама таго, што некаторыя расійскія і беларускія спартсмены не былі дапушчаныя на Алімпіяду.
«Кажуць, што добрымі намерамі выбрукаваная дарога ў пекла. Яны кажуць, што змагаюцца з допінгам, а на справе змагаюцца супраць асобных, кропкавых супернікаў, якія ім у нечым перашкаджаюць. Вось і ўсё», — сказаў спартыўны аглядальнік «Советской Белоруссіі» Сяргей Канашыц.
«У дадзеным выпадку імі аказаліся хто? Расія, Беларусь, — запярэчыў вядучы Вадзім Гігін. — Але на што гэта паўплывала? Расія як была чацвёртай у Лондане, гэтак чацвёртай і засталася. Недабрала нейкую колькасць медалёў».
«А ёсць яшчэ такі панятак як рэпутацыйныя страты. Яны ў спартыўнай Расіі цяпер каласальныя. У Рыа-дэ-Жанейра ж нават асвіствалі расійскіх спартсменаў. У алімпійскай вёсцы я размаўляў з расійскімі валейбалісткамі, яны казалі, што на іх глядзяць коса. На іх усіх глядзяць як на злачынцаў. У гэтым таксама быў іх немалы замысел», — падсумаваў Канашыц.
«Цяпер яны зрабілі такую правакацыю, праз 4 гады яны могуць паступіць дакладна гэтак сама толькі з нейкім іншым прэпаратам, а паўторная дыскваліфікацыя ў спорце пажыццёвая. Гэта брудныя палітычныя гульні», — гэта ўжо словы чэмпіёнкі свету па велатрэку Наталлі Цылінскай.
«Я размаўляў з журналістамі Russia Today, дык нават на расійскіх журналістаў глядзяць коса. І глядзяць, як ні дзіўна, не ўкраінцы, не амерыканцы, а глядзяць прадстаўнікі нейкіх невялікіх краін — Македоніі, Чарнагорыі», — прызнаўся вядучы АНТ Андрэй Бандарэнка.
Праўда, так ніхто ні разу і не сказаў, хто ж рыхтуе такія падкопы супраць нашых спартсменаў. Толькі дзюдаіст Націк Багіраў жартам адзначыў: «Як змагацца з несправядлівасцю ў спорце? Павялічыць тэрыторыю Беларусі да памеру ЗША».
Цяпер чытаюць
60‑гадовая п’яная беларуска ператварыла палёт з Парыжа ў Вільню ў кашмар3
Каментары