Чысты Мінск? Вуліца Ілімская патанае ў смецці ФОТЫ
У «Нашу Ніву» звярнуўся чытач. Паведаміў, што ў доме па адрасе Ілімская, 12 і суседніх дамах адначасова звольніліся ўсе дворнікі, у выніку чаго стварылася невыносная сітуацыя.
Мы паехалі на месца. У панядзелак уваход у пад'езд дома 12 на вуліцы Ілімскай перагароджваў перапоўнены бак, побач з ім ляжалі мяшкі са смеццем.
Жанчына ў халаце збірае вакол пад'езда дробнае смецце рукамі: «У нас былі вельмі працавітыя дворнікі, мы іх вельмі любілі, але ў адзін момант яны ўсе зніклі».
У доме 17 на вуліцы Ілімскай жыхары запрашаюць ацаніць стан іх пад'езда: смурод, кожны кут упрыгожаны жоўтай лужынай. Кампазіцыю дапаўняюць бычкі, бутэлькі, рэкламныя буклеты. Смеццеправоды даўно забітыя смеццем даверху.
Але тамбуры, якія жыхары павінны прыбіраць самі, аказаліся вельмі дагледжанымі.
Каля двух гадоў у дома па адрасе Ілімская, 17 няма дворніка. Дамафон ніхто не рамантуе, таму іх пад'езд — і грамадская прыбіральня, і прытулак для бяздомных жывёл. Пад’езд прыбіраюць рэдка, праз тры дні пасля чарговай скаргі ў адзіны кантакт-цэнтр ЖКГ 115.
На мясцовы ЖЭС жыхары ўжо не спадзяюцца, замест гэтага пішуць скаргі ў вышэйшыя інстанцыі.
А вось жыхары дома 59 па вуліцы Несцерава бачаць сваю прыбіральшчыцу штодня, ЖЭС збудаваў і пандус для інваліда-калясачніка ў іх пад'ездзе.
Па дарозе ў ЖЭС сустракаем дворнічыху, якая скардзіцца, што заробкі моцна ўпалі, інструмента, спецадзення і мыйных сродкаў ім практычна не выдаюць. Заробак 200—210 рублёў, калі не будзеш браць дадатковую падпрацоўку. Побач праходзіць мужчына: «Падвал затапіла, хаджу ў ЖЭС, а там нікому няма справы да нас».
У ЖЭСе №95 галоўны інжынер адмовілася каментаваць без дырэктара, дырэктар, у сваю чаргу, на нарадзе ў ЖРЭА.
У прыёмнай «Нашай Ніве» расказалі, што нядаўна аб'ядналі ЖЭСы №91, 95 і 74 і, калі раней дворнікі прыбіралі кожны дзень, то цяпер цераз дзень. Заробак паменшаў, вось брыгада, якая працавала ў доме 12 па вуліцы Ілімскай, і звольнілася. Цяпер дворнікі з другіх участкаў прыбіраюць у сябе, потым ідуць і прыбіраюць на суседняй тэрыторыі, што выклікае зацяжкі і збоі.
«Наша Нiва» — бастыён беларушчыны
ПАДТРЫМАЦЬ
Каментары