Барацьба за рэсурсы? Прапагандысцкі сайт Еadaily прайшоўся пра тутэйшых прыхільніках рускага свету
Расійскае інфармацыйнае агенцтва Eadaily, вядомае крайне імперскай рыторыкай у дачыненні да краін-суседзяў Расіі, выпусціла новы тэкст, прысвечаны Беларусі: тэма ўсё тая ж — святкаванне стагоддзя БНР.
У матэрыяле ёсць іранічны момант — аўтар Eadaily грунтоўна прайшоўся па асобных персанажах унутры Беларусі, якія лёгка пазнаюцца з апісання.
Абураючыся масштабам канцэрту каля Опернага ў Мінску, журналіст падкрэслівае:
«Дзіўным чынам такі эфект не змаглі спрагназаваць «адэкватныя дзяржаўнікі», якія абслугоўваюць мясцовыя сілавыя і прапагандысцкія структуры. У такіх «палітолагаў» значна лепш атрымліваецца асвойваць расійскія і беларускія бюджэтныя грошы на розныя праекты, паралельна удзельнічаючы ў ганеннях прыхільнікаў «рускага свету» у Беларусі. І нават кантакты з Jamestown foundation і іншымі фондамі, неанацыстамі Заходняй Еўропы і неаязычнікамі Усходняй, а таксама сілавікамі розных краін не дапамаглі гэтым дзеячам, якія лічаць сябе экспертамі, прадбачыць хаця б прыблізна тое, што адбылося на самай справе».
«Ажно да сканчэння мітынгу ў Мінску яны запэўнівалі, — працягвае Eadaily, — што мерапрыемства ля Опернага будзе ці малалікім, ці не адбудзецца зусім, ці не будзе мець заяўленага эфекту. Да гэтага яны ж распавядалі ў дзяржаўных і недзяржаўных СМІ неверагодныя гісторыі аб фарміраванні нейкай «саюзнай ідэнтычнасці», аб прарывах джыпаў са зброяй праз украінска-беларускую граніцу, задавалі з'едлівыя пытанні арыштаваным і абвінавачаным у экстрэмізме «прарасійскім публіцыстам», ганьбілі «расійскіх алігархаў», абгрунтоўвалі няўдаласць адстойвання Расіяй сваіх нацыянальных інтарэсаў: увогуле, усяляк дапамагалі ўладам на прапагандысцкім фронце, у тым ліку ў расійскім інфармацыйным полі, на расійскіх тэлеканалах».
«Не прызнаўшы сваёй экспертнай непаўнавартаснасці, яны пераключыліся на каментаванне вынікаў выбараў у Расіі, трагедыі ў Хатыні, перспектыў гандлю з Грузіяй і, вядома ж, недзеяздольнасці ідэй БНР — пасля ўсяго таго, што адбылося ў Беларусі да 25 сакавіка і ў гэты дзень ўключна ў Мінску, Гродна, па ўсёй рэспубліцы», — падсумоўвае аўтар.
Найхутчэй, такім чынам розныя групоўкі «экспертаў» змагаюцца за рэсурсныя плыні. Аргументацыяй тут з'яўляецца закладзеная думка, што «мы можам прасоўваць рускі свет лепш за іх».
Цяпер чытаюць
Гродзенскага падлетка адправілі ў школу ў Літву — ён вывучыў літоўскую і цяпер перакладае ў Еўрапарламенце. Перакладаў ён і Ціханоўскіх17
Каментары