Аляксандр Лукашэнка заявіў, што ў Аршанскім рэгіёне ўведзены асобы рэжым кіравання.
«Кожны, пачынаючы ад звычайнага чалавека, павінен быць напружаны гэтак жа, як кіраўнікі прадпрыемстваў і адпаведныя структуры ўлады. Людзі павінны адчуваць, што там пачалася, вобразна кажучы, рэвалюцыя», — адзначыў кіраўнік дзяржавы падчас нарады па разглядзе кадравых прапаноў.
Ці адчулі ўжо аршанцы подых рэвалюцыі?
У наваколлі Аршанскага інструментальнага завода, стан якога каштаваў пасад двум міністрам, лёгкае трымценне адчуваецца. Каля прахадной стаяць прэстыжныя аўто (у тым ліку з мінскімі нумарамі), у іх дзяжураць шафёры — знак прысутнасці высокага начальства. Каля завода прагульваецца нетутэйшы чалавек з вайсковай выпраўкай. Частка работнікаў, праўда ў адгулах: тыя, хто працаваў у мінулыя выходныя, рыхтуючы, відаць, прадпрыемства да візіту кіраўніка дзяржавы.
«Завод хацелі летась банкрутам абвяшчаць. Даў фінансаванне — таму такі і скандал цяпер» — тлумачаць простыя работнікі, чаму менавіта на іх завод абрынуўся Лукашэнка.
У цэлым, каб даведацца пра ўражанні аршанцаў ад візіту, дастаткова каля прахадной любога прадпрыемства проста спытаць, не ўдакладняючы: «Як вы тут пасля стрэсу?»
«Мы дагэтуль пад уражаннем», — кажуць, ідучы дадому пасля скарочанага працоўнага дня работнікі «Оршааграпраммаша».
Тым часам горад не выглядае на Петраград 1917-га. Сонна плыве абмялелы Дняпро, працуе кірмаш, у сталоўцы каля інструментальнага — спецабслугоўванне: накрытыя вясельныя сталы. Па ўсім горадзе картэжы, маладыя фатаграфуюцца каля мясцовай славутасці — вадзянога млына. Напружылася пакуль толькі начальства.
«Што будзе? А хто яго знае. Зараз такі шоргат пачнецца — усе міністры да нас будуць ездзіць адзін за адным», — кажа работнік жыллёва-камунальнай гаспадаркі. Яго галіновага міністра чакаюць у Оршы ў суботу.
Цяпер чытаюць
Зніклы Котаў выехаў з Турцыі морам — магчыма, у бок Расіі4
Каментары