Восьмы дзень працягваецца масавая моладзевая галадоўка пратэсту. У ёй бяруць удзел каля 40 актывістаў зь Менску, Салігорску, Горадні, Жодзіна, Ліды і ўкраінскага Луцку. Галадоўнікі патрабуюць спыніць крымінальны перасьлед актывістаў «Маладога фронту», а таксама вызваліць палітычных зьняволеных у Беларусі. Сёньня частка непаўналетніх удзельнікаў акцыі спынілі галадоўку.
Сёньня кіраўніцтва «Маладога фронту» заклікала ўсіх няпоўнагадовых актывістаў спыніць удзел у галадоўцы.
Гаворыць лідэр арганізацыі Зьміцер Дашкевіч:
(Дашкевіч: ) «Захапляючыся мужнасьцю і рашучасьцю гэтых хлопцаў і дзяўчат, мы ня можам браць на сябе такой вялікай адказнасьці за іх здароўе і жыцьцё. І ўжо вядома, што цяпер некаторыя няпоўнагадовыя спыняюць свой удзел у гэтай акцыі. Далей акцыя будзе працягвацца паўнагадовымі актывістамі».
Зьміцер Дашкевіч кажа, што колькасьць удзельнікаў галадоўкі ня толькі не паменшыцца, але і будзе расьці, паколькі да акцыі штодня далучаюцца новыя людзі з розных куткоў Беларусі. 19-гадовы мянчук Аляксей Янушэўскі галадае ўжо восьмы дзень у сваёй кватэры.
(Янушэўскі: ) «Адчуваю сябе больш-менш нармальна. Ёсьць стомленасьць. Я ня надта аптымістычна стаўлюся да таго, ці пойдуць улады на нейкія кампрамісы, але тое, што грамадзтва ў Беларусі і за межамі нашай краіны будзе ведаць пра тое, што ў Беларусі галадае моладзь, і што гэта ўжо апошні крок, на які можна пайсьці, – гэта дасьць нейкі плён».
Галадоўнікі ў Жодзіне ўжо адчулі рэакцыю ўладаў, але не датычна выкананьня патрабаваньняў спыніць крымінальны перасьлед апазыцыйнай моладзі. Гаворыць Зьміцер Чарткоў:
(Чарткоў: ) «Нас шукаў намесьнік кіраўніка міліцыі. Сёньня ўжо тэлефанавалі з КДБ. Таксама спрабуюць даведацца, што мы робім і як».
Сам Зьміцер Чарткоў галадае дома ўжо чацьверты дзень, а вось моладзевы актывіст Сяржук Давідзенка вымушаны спалучаць галадоўку з працай на прадпрыемстве «БелАЗ».
(Давідзенка: ) «Я электраманцёр. Імкнуся шмат ня рухацца, захоўваю энэргію».
(Карэспандэнтка: ) «Як вашыя калегі ставяцца да таго, што вы трымаеце галадоўку?»
(Давідзенка: ) «Тут такі кантынгент, што палітыкай не цікавіцца. Ніхто не разумее, дзеля чаго мы гэта робім».
Студэнт філялягічнага факультэту Гарадзенскага ўнівэрсытэту Зьміцер Цесьлянок гэтаксама вымушаны спалучаць галадоўку са здачай іспытаў.
(Цесьлянок: ) «Безумоўна, складана, але ўжываю мёд і гатаваную ваду. Людзі па-рознаму рэагуюць. Адныя кажуць – трымайцеся, другія – спыняйце».
Як паведаміў Радыё Свабода лідэр «Маладога фронту» Зьміцер Дашкевіч, на гэтым тыдні плянуецца стварыць агульны цэнтар галадоўкі, і тады ўсе ўдзельнікі акцыі будуць знаходзіцца разам у адным памяшканьні ў Менску.
Удзельнікі акцыі накіруюць зварот у адміністрацыю прэзыдэнта, КДБ і МУС з наступнымі патрабаваньнямі: спыніць крымінальныя справы супраць лідэраў «Маладога фронту» Зьмітра Дашкевіча, Барыса Гарэцкага, Сержука Лісічонка, Сержука Марчыка й Алега Корбана, а таксама адмяніць незаконныя прысуды й неадкладна вызваліць Артура Фінькевіча, Паўла Севярынца, Мікалая Статкевіча, Андрэя Клімава, Мікалая Астрэйку, Эніру Браніцкую, Аляксандра Шалайку, Цімафея Дранчука, Зьмітра Зубра, Аляксандра Казакова.
Выстаўленыя і дадатковыя патрабаваньні: аднавіць на вучобе выключанага з салігорскага ПТВ №72 Максіма Сяменчыка і выключанага зь Беларускага дзяржаўнага пэдагагічнага ўнівэрсытэту Аляксея Янушэўскага.
Цяпер чытаюць
«Губазікаўцы схіляюць Калеснікаву да высылкі, але яна не хоча»1
Каментары