Жыхар Салігорскага раёна выкраў у сябра хаскі, каб падарыць жонцы
У салігорскую міліцыю патэлефанаваў усхваляваны ўладальнік сабакі пароды хаскі і паведаміў, што двухгадовы ўлюбёнец сям'і знік проста з вальера, пры гэтым другі сабака, «дваровай» пароды, застаўся дома.
Увагу міліцыі прыцягнуў знаёмы ўладальніка, які гасцяваў напярэдадні. Мужчына з жонкай прыехалі ў вёску, сабака спадабаўся таварышу, які пацікавіўся яго коштам і радаводам. У нейкі момант госць нават заявіў, што забірае хаскі. Уладальнік перавёў размову ў жарт і на ўсялякі выпадак нагадаў, што заплаціў за яго 350 рублёў.
Сышчыкі крымінальнага вышуку наведаліся да сямейнай пары ў Салігорск, дзе акрамя гаспадароў іх сустрэў той самы сабака. Да гэтага моманту новы ўладальнік выкупаў сабаку і купіў ашыйнік. Акрамя таго, Алмаз, якога так завуць па дакументах, стаў Піратам.
Затрыманы паведаміў, што яму даўно падабаюцца вялікія сабакі, а хаскі — мара яго жонкі. Выкласці за яго палову заробку ён быў не гатовы, таму прыехаў раніцай на таксі і забраў сабаку ў сябра.
Завялі крымінальную справу за крадзеж.
Каментары