Сям'і Аляксандра Тарайкоўскага, забітага на Пушкінскай, ужо сабралі 40 тысяч рублёў
Пра гэта «Нашай Ніве» распавяла Алена, грамадзянская жонка Аляксандра.
«Зараз у мяне на картцы 33 000 рублёў. Пэўную суму я ўжо здымала, гэта каля 3000 даляраў у эквіваленце.
Грошы працягваюць прыходзіць. На наступным тыдні мы з адвакатам плануем зрабіць спіс усіх пералічэнняў і апублікаваць яго, — кажа Алена.
— У гэтыя дні я адчуваю проста неверагодную падтрымку, мне тэлефануюць і пішуць незнаёмыя людзі. Выклікала таксі, ехалі, размаўлялі, дык таксіст, даведаўшыся [пра Аляксандра], нават грошы не ўзяў. Я вельмі ўдзячная ўсім за падтрымку, яна зараз мне вельмі неабходная».
У Алены двое дачок. Старэйшай — 11 год, малодшай, агульнай з Аляксандрам, — усяго тры.
«Старэйшая дачка ўсё ведае, разумее. Задае пытанні нават пра тое, што адбываецца ў краіне, чаму так. Але на пахаванні яе не было.
Малодшая дачка часам пытаецца пра тату, я кажу, што ён ў бальніцы. Дачка перажывае, пытаецца, ці робяць яму ўколы. Я кажу пра тату толькі добрае: будзь смелай, як тата, будзь мужнай, як тата.
Будзем звяртацца да псіхолага, таму што яна напужаная. Магчыма, тым, што ўбачыла з акна, як АМАП хапае людзей. Трэба гутарыць з псіхолагам, бо ў мяне язык не паварочваецца сказаць, што тата больш не прыйдзе», — кажа Алена.
Аляксандр Тарайкоўскі загінуў 10 жніўня на Пушкінскай падчас сілавога разгону пратэстоўцаў, якія патрабавалі сумленных выбараў. Аляксандру было 34 гады. Тысячы беларусаў прыйшлі развітацца з ім у суботу, 15 жніўня. Ля месца яго гібелі людзі стварылі стыхійны мемарыял, да якога штодзень нясуць кветкі.
Агенцтва Associated Press апублікавала відэа, на якім бачна, што Аляксандр ішоў у бок сілавікоў з пустымі рукамі. Пасля стрэл — і ён падае на зямлю. Сям’і паведамілі, што Аляксандр памёр ад страты крыві.
Цяпер чытаюць
«Падняў бы ж*пу, праехаў па магазінах». Праўладная блогерка абрынулася на Азаронка за хлусню пра бульбу12
Каментары