Палац мастацтваў адмовіў у памяшканні для правядзення Пятага з’езда беларусаў свету. Гэта ўжо 18‑ая адмова ў сталіцы.
Сёння, 8 мая, Рэспубліканская мастацкая галерэя (вул. Казлова,3), што належыць Беларускаму саюзу мастакоў, адмовіла Згуртаванню беларусаў свету «Бацькаўшчына» ў прадстаўленні памяшкання для правядзення Пятага з’езда беларусаў свету.
У афіцыйным лісце, падпісаным дырэктарам прадпрыемства А. Зінкевічам, гаворыцца, што магчымасці прадставіць памяшканне ў арэнду няма «ў сувязі з дзеяннем раней заключаных дамоў арэнды».
Кіраўніцтва МГА «ЗБС «Бацькаўшчына» зазначае, што першапачаткова варыянт правядзення з’езда ў Палацы мастацтваў не разглядаўся, паколькі там невялікае памяшканне. Аднак пасля таго, як астатнія залы горада Мінска адмовілі ў арэндзе, вырашана было даслаць заяўку ў Палац мастацтваў, асабліва ўлічваючы той факт, што гэтая зала належыць Беларускаму саюзу мастакоў і там праводзіліся пасяджэнні ТБМ ды іншыя імпрэзы беларускіх грамадскіх аб’яднанняў.
Раней у прадстаўленні памяшкання адмовілі Палац Рэспублікі, Палац прафсаюзаў, ДК МТЗ, ДК МАЗ, актавая зала Лінгвістычнага ўніверсітэта, Дом афіцэраў і інш. Усяго, з сённяшняй, 18 адмоваў.
***
V З’езд беларусаў свету МГА «ЗБС «Бацькаўшчына» запланаваны на 18‑19 ліпеня 2009 г.
Удзел у ім павінны ўзяць 400 дэлегатаў з 29 краін.
Ранейшыя з’езды, якія праводзяцца раз на чатыры гады, праводзіліся выключна ў Мінску.
Кіраўніцтва Згуртавання не выключае, што, калі не ўдасца знайсці памяшкання ў Мінску, галоўны форум беларускай дыяспары будзе праведзены па‑за межамі Беларусі.
Дзядок патлумачыў, чаму вызвалілі менавіта тых палітвязняў, каго вызвалілі31
Каментары