У сотнях населеных пунктаў з-за непагадзі праблемы з электрычнасцю
7 кастрычніка па тэрыторыі краіны праходзіць цыклон са шквалістым ветрам. Па даных на 17.00 былі зафіксаваныя перабоі ў электразабеспячэнні ў 296 населеных пунктах, паведаміла Міністэрства энергетыкі.
Цягам дня электразабеспячэнне, як паведамляецца, было адноўлена ў 340 населеных пунктах. Наступствы непагадзі найбольш адчувальныя ў Мінскай, Гродзенскай і Віцебскай абласцях. Больш за ўсё пацярпелі Маладзечанскі, Барысаўскі, Мінскі, Глыбоцкі, Полацкі, Навагрудскі і Іўеўскі раёны.
Энергетыкі працуюць ва ўзмоцненым рэжыме, у ліквідацыі наступстваў непагадзі задзейнічалі 72 аварыйныя брыгады і 69 адзінак тэхнікі. Работы ўскладняюць паваленыя ветрам на лініі электраперадач дрэвы і галіны.
У той жа час Міністэрства па надзвычайных сітуацыях паведамляе, што ў Мінску паваленыя дрэвы пашкодзілі 6 аўтамабіляў. «На 18.00 падраздзяленні МНС выязджалі на распілоўку дрэў, зняцце лістоў бляхі і банэраў 30 разоў», — адзначае ведамства.
Каментары