Стала вядома, хто лётаў на Шры-Ланку разам з Анжалікай Мельнікавай і яе агентам

Так, у студзені 2024 года сумесна з Лабеевым на Шры-Ланку прыбыў таксама агент КДБ з пашпартам прыкрыцця з фальшывымі данымі. Яго асоба пакуль не раскрываецца, умоўна «Кіберпартызаны» называюць яго «Васіль».

Акрамя таго, у адзін час з Лабеевым на Шры-Ланку з Беларусі прыбылі былы следчы Андрэй Андрэеў з жонкай Ірынай Андрэевай (Мацурай), у мінулым — супрацоўніцай Барысаўскага РУУС.

Павялічыць

Павялічыць

У кантэксце гэтай гісторыі асабліва цікава, што ў КДБ прызначылі менавіта Андрэя Андрэева ў якасці суправаджаючага для Лабеева. Бо фармальна служба ў сілавых структурах скончылася для гэтага былога следчага Дэпартамента фінансавых расследаванняў па Мінскай вобласці ў 2010 годзе. Тады Андрэева прысудзілі да зняволення ў папраўчай калоніі №3 за атрыманне хабару сумай 5 тысяч даляраў пры выкананні службовых абавязкаў.

Пасля вызвалення Андрэеў не быў адноўлены на службе і на момант паездкі на Шры-Ланку афіцыйна працаваў у ТАА «Эліронбуд» як інжынер па матэрыяльна-тэхнічным забеспячэнні.

Ягоная жонка Ірына Андрэева таксама з 2020 года не знаходзіцца на службе ў МУС, дзе раней працавала на пасадзе штатнага інжынера-праграміста. Яе афіцыйнае месца працы — ТАА «Алеф Лайф».

Магчыма, праца менавіта гэтых людзей спатрэбілася КДБ падчас сустрэчы ў адпачынку з Мельнікавай праз спецыфічныя навыкі як мінімум аднаго з іх.

А паколькі фармальна Андрэевы не з'яўляюцца супрацоўнікамі разведкі, то іх верагоднае прыцягненне да падобных паездак выглядае незвычайна.

Усе трое, муж і жонка Андрэевы і агент «Васіль», правялі ўвесь час сумеснага «адпачынку» ў тыя ж самыя даты, калі на востраве знаходзілася Анжаліка Мельнікава, а затым разам з Лабеевым вярнуліся ў Беларусь.

З меркаванняў бяспекі «Кіберпартызаны» не называюць крыніцу гэтай інфармацыі, аднак сцвярджаюць, што дакладнасць яе імі праверана і не падлягае сумневу.

Асобна звяртаецца ўвага на тое, што ў той жа дзень, калі Лабееў з іншымі супрацоўнікамі КДБ ляцеў у Маскву, на тым жа самым рэйсе былі і 9 супрацоўнікаў кампаніі «Кока-Кола Беврыджыз Беларусь», у тым ліку яе дырэктар Аляксандр Дзянісаў — стары знаёмы Мельнікавай. Аднак у Шры-Ланку яны не паляцелі, а засталіся ў Маскве. Магчыма, іх паездка была звязаная з падаўжэннем ліцэнзійнага пагаднення з Coca-Cola да 2033 года, але «Кіберпартызанам» падаецца дзіўным супадзенне даты і маршруту.

***

Пра тое, што Анжаліка Мельнікава прапала, стала вядома 28 сакавіка пасля заявы Паўла Латушкі.

Разам з тым вядома, што яна пакінула тэрыторыю Польшчы і Еўрасаюза 26 лютага 2025 года. Паводле расследавальнікаў, за дзень да вылету яна забраніравала пражыванне ў пяцізоркавым гатэлі на Шры-Ланцы, дзе ўжо бывала раней. З 28 лютага па 7 сакавіка Мельнікава жыла ў тым гатэлі з дзецьмі. 7 сакавіка Мельнікава з дзецьмі паляцела ў Дубай, там ейны след губляецца.

Паводле «Кіберпартызанаў», у сакавіку з рахунку фонду Мельнікавай былі выведзеныя вялікія сумы грошай, што прызначаліся для «Кіберпартызанаў» і Каардынацыйнай рады — агулам з рахунку вывелі 150 тысяч даляраў.

Пасля гэтага кантактавала з паплечнікамі з Каардынацыйнай рады праз відэасувязь, але не праз асабістыя сустрэчы: казала, што хварэе. 25 сакавіка перастала выходзіць на сувязь. 13 сакавіка ейны тэлефон выкарыстоўвалі для доступу да файлаў Каардынацыйнай рады з беларускага IP-адрасу — імаверна, тэлефон быў на тэрыторыі Беларусі.

Дзе жанчына знаходзіцца цяпер — невядома.

• 5
• 1
• 7
• 7
• 11
• 2
• 15
• 0