На станцыі Калядзічы пад Мінскам узніклі заторы па грузавых перавозках
На чыгуначнай станцыі Калядзічы пад Мінскам назіраюцца сур’ёзныя затрымкі з падачай грузаў. Як паведамляюць лагістычныя кампаніі, праблемы ўзніклі з-за вялікіх затораў на чыгунцы пасля таго, як Польшча ў сярэдзіне верасня цалкам закрыла мяжу з Беларуссю, піша Office Life.
Аўтамабільныя пераходы «Казловічы» і «Брэст», а таксама чатыры чыгуначныя пункты не працавалі з ночы на 12 верасня ў сувязі з вучэннямі «Захад-2025». Толькі ў ноч на 25 верасня іх зноў адкрылі.
За гэты час сітуацыя істотна ўскладнілася: у Брэсце «захраслі» больш за 130 грузавых цягнікоў. Пры гэтым менавіта брэсцкі пагранпераход з’яўляецца асноўным шляхам сухапутных паставак кітайскіх тавараў у Еўрасаюз: праз Польшчу праходзіць каля 90% усіх чыгуначных перавозак паміж Кітаем і ЕС. Гадавы аб’ём гэтых перавозак перавышае €25 мільярдаў. На долю беларуска-польскага калідора прыпадае 3,7% ад усёй гандлёвай плыні паміж Кітаем і Еўропай.
Альтэрнатывы гэтаму маршруту пакуль няма. Транскаспійскі міжнародны транспартны калідор, які ідзе ў абход Расіі і Беларусі праз Каспійскае мора, працуе, але ён патрабуе значна больш часу і не разлічаны на такія аб’ёмы грузаў.
У выніку на станцыі Калядзічы ўзніклі заторы, і падачу грузаў там затрымліваюць. Некаторыя цягнікі вымушана стаяць у дарозе па 4—6 дзён. Аднак лагістыкі мяркуюць, што на працягу тыдня сітуацыя павінна стабілізавацца, а транзітныя перавозкі вернуцца да звычайнага графіку.
Цяпер чытаюць
«У Віцебску заходзіў у тралейбус і казаў «Слава Украіне!». Украінца ў 67 гадоў пасадзілі за каменты, напісаныя пасля гібелі хроснай дачкі пад абстрэлам у Кіеве9
Каментары