Пад Ганцавічамі ўчастковы страляў у п'янага мужчыну. Сілавік атрымае кампенсацыю маральнай шкоды
Мужчына з нажом упэўнена пайшоў на міліцыянера, той вырашыў стрэліць, каб яго спыніць.
Стральба ў вёсцы Перавалокі Ганцавіцкага раёна здарылася ў ліпені. 73‑гадовая жанчына выклікала міліцыю на суседа. На месцы сілавікі ўбачылі мужчыну, як паведамляецца, з відавочнымі прыкметамі алкагольнага ап'янення. У руках у яго быў кухонны нож.
Убачыўшы ўчастковага, мужчына пайшоў проста на яго, размахваючы нажом і выкрыкваючы пагрозы. Міліцыянер сказаў мужчыну кінуць нож, а потым стрэліў яму ў нагу. Параненага перадалі медыкам, на яго завялі справу за пагрозу прымянення гвалту ў адрас сілавікоў, піша прэс-служба суда.
Акрамя таго, участковы падаў пазоў аб кампенсацыі маральнай шкоды на суму ў 2000 рублёў. Мужчына віну прызнаў толькі часткова. Ён пацвердзіў, што быў п'яны і ўзяўся за нож. Але пры гэтым сцвярджаў, што не пагражаў міліцыянтам і не абражаў іх.
У выніку суд прызначыў абвінавачанаму два гады калоніі ўзмоцненага рэжыму. Яшчэ ён павінен будзе выплаціць 2000 рублёў участковаму, які ў яго страляў.
Каментары