Сядзіба, дзе беларускамоўным прапануюць зніжкі — адна з найлепшых у Беларусі
«Гасцявы дом Бука Юліі» перамог у конкурсе «Лепшая аграэкасядзіба 2010 года».
«Гасцявы дом Бука Юліі» перамог у конкурсе «Лепшая аграэкасядзіба 2010 года».
Журы конкурсу «Лепшая аграэкасядзіба 2010 года», які ладзіцца «Белаграпрамбанкам», прызнала «Гасцявы дом Бука Юліі» найлепшым у намінацыі «Зялёная сядзіба». Сядзіба месціцца ў 12 км ад Глыбокага ў вёсцы Валодзькава («НН» пісала пра яе ў чэрвені 2009). І простыя наведнікі, і сябры журы ацанілі галоўную асаблівасць сядзібы спадарыні Юліі — яе натуральнасць. Тут няма сайдынгу ды іншых адзнак сучаснасці. Сядзіба захоўвае натуральную атмасферу простай сялянскай хаты. Як расказала «НН» Юлія Бука, яе прыемна ўразілі словы віцэ-прэм’ераў Анатоля Тозіка і Сяргея Румаса на цырымоніі ўзнагароджання. Яны казалі пра неабходнасць захавання вясковых хатаў у якасці аб’ектаў агратурызму.
«Мы прывыклі, што нас, беларускамоўных, называюць БНФ-мі, лепяць з нас ворагаў народу. І вось такі пазітыўны прыклад — сядзіба, дзе для беларускамоўных існуе зніжка, называецца адной з лепшых»,— кажа Юлія Бука. За перамогу яна атрымала аблігацыі «Белаграпрамбанка» на суму 3 млн беларускіх рублёў і памятныя прызы.
Гран-пры конкурсу атрымала сядзіба «Паўлінава», што ў Баранавіцкім раёне. Працуе другі год.
Хто яшчэ перамог у конкурсе
У намінацыі «Захаванне беларускіх традыцый» перамагла сядзіба «Міколаў востраў», Светлагорскі раён. Адметнасць — гаспадар сядзібы адрамантаваў 17-метровы млын — сапраўдны помнік культуры. У намінацыі «Здаровы лад жыцця» пераможцам стала «Сядзіба» з-пад Гомеля, якая спецыялізуецца на медыцынскай рэабілітацыі дзетак. Сядзіба «У Князева ў Любужы», што з-пад Магілёва, атрымала перамогу ў намінацыі «Гасціннасць». «Стыль і гармонія» — перамога сядзібы з Аршаншчыны «Сябры і К».
Конкурс «Лепшая аграэкасядзіба» праводзіцца ў рамках праграмы падтрымкі аграэкатурызму. Ён штогадовы, сёлета ладзіўся другі раз. Узнагароджанне пераможцаў адбываецца ў часе штогадовай Міжнароднай спецыялізаванай канферэнцыі «Аграэкатурызм — стан і перспектывы развіцця».
«На канцэртах няма месца радыкальнаму нацыяналізму, агрэсіі і гвалту». Макс Корж выказаўся наконт скандалу, які разгарэўся пасля яго выступу ў Варшаве3737
Каментары