17-гадовая сышла з жыцця акурат праз год пасля смерці хлапца
Спачатку наведала яго магілу ў Будславе, а пасля зрабіла сабе смерць.
Здарэнне адбылося 5 студзеня ў мястэчку Будслаў на Мядзельшчыне. 17-гадовая навучэнка Маладзечанскага каледжа прыехала ў госці да цёткі. Знайшлі дзяўчыну ўвечары ў адрыне.
Такім жа чынам рахункі з жыццём год назад, 6 студзеня 2011 года, звёў і яе малады чалавек Андрэй.
Незадоўга да самагубства Яня наведвала яго магілу. У яе кішэні знайшлі запіску. У ёй дзяўчына просіць нікога не дакараць у смерці.
Як паведамілі ў пракуратуры Мядзела, Яна па месцы жыхарства і вучобы характарызавалася станоўча. На ўліку ў нарколага ці псіхіятра не стаяла. Спробаў скончыць жыццё самагубствам у яе раней не фіксавалася, і, паводле папераў, пра такую магчымасць яна не выказвалася.
Яна пайшла з жыцця за тры тыдні да паўналецця.
Паходзіла яна з Мядзела з няпоўнай сям’і. Навучалася на 2-м курсе Маладзечанскага гандлёва-эканамічнага каледжа. Яе сяброўкі таксама гавораць пра яе толькі станоўчае і называюць самагубства нечаканасцю.
27 снежня на сваёй старонцы «Вконтакте» дзяўчына напісала: «Развучылася кахаць…»
Гэта быў апошні запіс. У пракуратуры Мядзела звязваюць суіцыд дзяўчыны з леташнім самагубствам яе маладога чалавека.
Выпадкі суіцыду сярод маладых людзей, у тым ліку непаўналетніх, здараюцца нярэдка. 24 лістапада ў Столінскім раёне застрэліўся 21-гадовы студэнт каледжа, 21 кастрычніка ў Гомелі здзейсніла суіцыд 17-гадовая дзяўчына. 18 кастрычніка ў Мінску здзейсніў самагубства 21-гадовы студэнт, скочыўшы з 7-га паверха. 30 верасня 16-гадовы хлопец кінуўся пад электрычку ў Мінску. 29 жніўня ў Баранавіцкім раёне звёў рахункі з жыццём 23-гадовы ўчастковы міліцыянер.
***
Тэлефоны службы экстранай псіхалагічнай дапамогі
Кругласуткавая служба экстранай псіхалагічнай дапамогі «Тэлефон даверу»: 8 (017) 202-04-01
Рэспубліканская тэлефонная «гарачая лінія» па аказанні псіхалагічнай дапамогі непаўнагадовым, што трапілі ў крызісную сітуацыю: 8-801-100-16-11
Спіс кантактаў экстраных службаў у рэгіёнах.
Цяпер чытаюць
Сяргей і Святлана Ціханоўскія сустрэліся з беларусамі ў Вільні1
Каментары