Глыбокае: праваслаўныя сьвятары кулакамі высьвятляюць адносіны

У праваслаўным прыходзе вёскі Мамаі Глыбоцкага раёну праваслаўныя сьвятары на людзях учынілі скандал бойкай. Падчас высьвятленьня адносінаў паміж сабой у храме, бацюшкі ўзламалі старажытныя замкі, пашкодзілі дзьверы.

Пра тое, што здарылася распавядае мясцовая жыхарка Фаіна Шаўчэнка:

Шаўчэнка: «Мы пачулі грукат у царкве. Пайшлі глядзець. Там быў айцец Вячаслаў з царквы ў Падсьвільлі і благачынны айцец Сергій. У нядзелю тут было скандал, ды і ў панядзелак».

Як высьветлілася, праваслаўныя сьвятары з суседніх глыбоцкіх вёсак спрабавалі выгнаць з храма тамтэйшага настаяцеля айца Паўла. Апошні пераконвае, што калегі нават пабілі яго:

а.Павал: «Прыляцелі, службу не далі правіць. Крычалі: «Аддавай ключы!» Я ж нічога ня ведаў! Мяне штурхалі. Яны ж парушылі. Я іх не пускаў. Замкі зьбівалі сякерамі. Гэтак нельга. Трэба было патлумачыць спакойна. Яшчэ яны паехалі ў другую царкву. Там тое ж рабілі. Чаму так?»

Патлумачыць прымусовую адстаўку сьвятара Паўла я прасіў благачыннага Полацкай эпархіі айца Сергія. Той наадрэз адмовіўся. Іншыя царкоўнікі таксама не былі гаваркімі. Аднак удалося даведацца, што сьвятару з Мамаёў не аднойчы прапаноўвалі пакінуць прыход па ўласным жаданьні. Яго вінавацілі ў непаслухмянасьці, парушэньнях ня толькі царкоўнай дысцыпліны, але й заканадаўства.

Як зрэагавалі на скандал вернікі? Мясцовая жыхарка Ала Максімчук:

Максімчук: «Яго раней выклікалі, але ён не паехаў. То няхай бы пісьмова паведамілі: «Ты – вызвалены! Але ніхто нічога: прыляцелі і пачалі, і пачалі... Наш айцец ня ведаў, што рабіць. Сьвятары выставілі сябе ў такім сьвятле, што я нават не ўяўляю, што такое магло адбыцца!»

Але крытыкуюць ня толькі сьвятароў, якія пры сьведках пасчалі бойку з айцом Паўлам. Дастаецца і самому сьвятару з Мамаёў. Так, краязнаўца Ўладзімер Скрабатун даводзіць, што той самавольна пачаў будавацца поруч з храмам:

Скрабатун: «Гэтыя пабудовы закрываюць пэрспэктыву на сам будынак – яго ня бачна. І гэта прывезеныя зь вёсак сялянскія хаты, якія пастаўленыя ўнутры царкоўнай агароджы на сваіх падмурках».

Адну хату айцец Павал паставіў літаральна на магіле мясцовай верніцы Зінаіды Шаурка. Яна карысталася ў вёсцы такім аўтарытэтам, што сьвятары, прыхаджане і сельсавет пагадзіліся пахаваць яе за царкоўнай агароджай. Айцец жа Павел паставіў зруб на магілу – цяпер яна акурат у цэнтры будучага жытла.

• 0
• 0
• 0
• 0
• 0
• 0
• 0
• 0