Нямігу адновяць у стылі ХІХ стагодзьдзя: з падземным паркінгам і эскалятарамі. Архітэктурная фантазія архітэктара Дулевіча «па матывах» старога гораду ўхваленая. Будаўніцтва пачнецца сёлета.
 |
Стагодзьдзе таму вузенькая вулачка з майстэрнямі рамесьнікаў і лаўкамі гандляроў сёньня — «сіці», справавы цэнтар. Пасьля доўгіх спрэчак, што лепей — адбудаваць ранейшую Нямігу ці дарэшты «запраторыць» яе пад шкло і бэтон, — архітэктары і гісторыкі спыніліся на «залатой сярэдзіне». Правы бок вуліцы з Гандлёвым домам «На Нямізе» застанецца ранейшым, а левы, дагэтуль пусты, адновяць у стылі ХІХ стагодзьдзя. Такое рашэньне прыняла рэспубліканская навукова‑мэтадычная рада ў пытаньнях гісторыка‑культурнай спадчыны пры Міністэрстве культуры.
Часткова гэты праект ужо рэалізаваны — ад праспэкту Пераможцаў да вуліцы Камсамольскай. Забудаваць пустку між Камсамольскай і Гарадзкім Валам даверылі «Творчай майстэрні архітэктара Дулевіча».
— Калі ўзнаўлялі ўчастак да вуліцы Камсамольскай, стылізаваныя пад архітэктуру пазамінулага стагодзьдзя дамы паднялі на плятформу, пад якой разьмясьціўся паркінг. Паводле праекту Генадзя Дулевіча, паркінг пойдзе пад зямлю, — адзначае асаблівасьць новага варыянту рэканструкцыі навуковы сакратар навукова‑мэтадычнай рады Вольга Міхайлава.
Сам Генадзь Дулевіч кажа, што ня ставіў мэтай узнавіць вуліцу ў яе першапачатковым выглядзе.
— Ранейшай Нямігі ўжо ніколі ня будзе. Яна загінула пад нажом урбанізацыі ў 70‑я гады. Тут часткова захавалася забудова ХІХ стагодзьдзя, вось яе і трэба захаваць і зьвязаць з сучаснымі будынкамі. Я прапаную архітэктурную фантазію «па матывах» ранейшай Нямігі, якая «прымірыць» стары горад з новым.
Навукова‑мэтадычная рада ўхваліла гэтую ідэю. Будаўнічыя работы пачнуцца сёлета. «Але дэталі праекту яшчэ будуць удакладняцца, — кажа Вольга Міхайлава. — Трэба прадумаць, як па‑новаму арганізаваць у гэтым раёне рух транспарту».
Ужо вядома, што вуліца Рэвалюцыйная стане пешаходнай: падняцца на яе зь Нямігі можна будзе па лесьвіцы ці эскалятары. У шматфункцыянальным комплексе, які разьмесьціцца ў старажытных дворыках, адчыняцца новыя выстаўныя залі, крамы, кавярні. У пасьпяховасьці праекту Генадзь Дулевіч не сумняваецца. Але канчатковую ацэнку «новай Нямізе» дасьць час.
Цяпер чытаюць
«На канцэртах няма месца радыкальнаму нацыяналізму, агрэсіі і гвалту». Макс Корж выказаўся наконт скандалу, які разгарэўся пасля яго выступу ў Варшаве3636
Каментары