Сілавікі выдалі сваю версію справы афганца з ампутаванай рукой. Дадалі і ягоныя хвалебныя словы
Міністэрства ўнутраных спраў адрэагавала на днямі апублікаваную інфармацыю пра былога афганскага вайскоўца, які быў нібыта збіты беларускімі сілавікамі так, што яму давялося ампутаваць руку. Паводле афіцыйнай заявы МУС, інфармацыя пра збіццё не адпавядае рэчаіснасці, хоць факт калецтва афганскага афіцэра прызнаецца.
Па версіі МУС, афганец Джыхад Махамад Гуль прыбыў у Беларусь з Расіі. 30 чэрвеня яго затрымалі ў Мінску разам з групай нелегальных мігрантаў. Паколькі ў мужчыны скончыўся тэрмін дзеяння расійскай візы, якая дазваляла знаходзіцца ў Беларусі, то 1 ліпеня ён самастойна пакінуў Беларусь і паехаў у Расію.
«Аднак мужчына незаконна вярнуўся ў Беларусь і 27 ліпеня звярнуўся ў сталічную ўстанову аховы здароўя. Пасля аказання меддапамогі адпушчаны, але праз два дні шпіталізаваны і знаходзіўся на лячэнні да 20 верасня», — паведамляюць сілавікі.
Пасля таго 9 верасня ў Дэпартамент па грамадзянстве і міграцыі, як сцвярджаецца, паступіў зварот ад Прадстаўніцтва ААН па справах уцекачоў, што гэты чалавек з ампутаванай рукой жадае падаць хадайніцтва аб наданні статусу бежанца або іншай форме абароны ў Беларусі. 22 верасня ДГіМ паведаміў, што пасля заканчэння лячэння яму трэба асабіста звярнуцца ва ўпраўленне па справах мігрантаў Віцебскай вобласці для падачы хадайніцтва. Таксама яму прапанавалі месца ў пункце часовага размяшчэння бежанцаў у Віцебску.
Сёння, як сцвярджае прэс-служба МУС, мужчына прыехаў у Віцебск для падачы хадайніцтва, дзе яго сустрэлі з гатоўнасцю дапамагчы.
У сваю чаргу, галоўная доктарка Гарадской клінічнай бальніцы хуткай медыцынскай дапамогі горада Мінска Вольга Святліцкая заявіла, што медыкі зрабілі ўсё магчымае, каб захаваць жыццё пацыента. Па яе словах, ён прабыў у бальніцы 52 дні, а выдаткі бюджэту на яго лячэнне перавысілі 56 тысячаў рублёў і пакуль не кампенсаваныя.
Пытанне, дзе Джыхад Махамад Гуль так пакалечыўся, што яму спатрэбілася ампутацыя, абыходзяць як сілавікі, так і доктарка.
Не праясняе гэтага і сам мужчына, у паведамленні МУС прыводзяцца толькі гэтыя нібыта сказаныя ім словы:
«Фізічная сіла з боку беларускіх паліцэйскіх да мяне не прымянялася. І я хачу прывезці ў Беларусь сваю сям'ю, бо тут бяспечна!»
Былога афганскага вайскоўца так моцна пабілі ў Беларусі, што яму давялося ампутаваць руку
Пракуратура хоча, каб міліцыя больш жорстка карала хатніх тыранаў: патрабуюць актыўней выкарыстоўваць ахоўнае прадпісанне
«Чувак дзела сказаў». Людзі масава падтрымалі студэнта-афрыканца
«Пад запіс на камеру задавалі пытанні, сканавалі тэлефон, перапіску». Як цяпер праходзяць допыты на мяжы Беларусі
Каментары