Праграма ад беларускіх праграмістаў рыхтуецца знішчыць манаполію Skype
Праграму прыдумалі ў Ізраілі, але праца над стварэннем вядзецца ў Мінску і Брэсце.
Бізнэс-выданне Bloomberg Businessweek апублікавала вялікі артыкул, прысвечаны рынку беларускіх ІТ-кампаній, што прапануюць адносна танныя паслугі па стварэнні якасных праграм. У цэнтры гісторыі — аплікацыя Viber, якую называюць «знішчальнікам Skype».
Насамрэч Viber прыдумалі ізраільскія бізнэсоўцы, якія да Беларусі маюць невялікае дачыненне. Затое ствараецца праграма ў Мінску, дзе знаходзіцца офіс кампаніі, і філіял у Брэсце. Тут працуюць, калі верыць Bloomberg, «вымуштраваныя ў матэматыцы, фізіцы і іншым навуках маладыя энтузіясты».
«У Viber каля 40 супрацоўнікаў у Беларусі, і ўсе яны мільярдэры ўжо цяпер — калі лічыць у мясцовых рублях», — піша выданне.
Viber, распрацаваны яшчэ 3 гады таму, дазваляе камунікаваць з дапамогай галасавой сувязі, тэкставых паведамленняў і абмену малюнкамі цалкам бясплатна. Патрэбны толькі мабільны інтэрнэт пад рукой, прычым не абавязкова Wi-Fi.
Цяпер у аплікацыі болей за 100 мільёнаў карыстальнікаў. Гэты факт дазваляе стваральнікам праграмы называць яе «забойцам Skype»: маўляў, праграма зручнейшая за стары сэрвіс, прызначаны найперш для настольных камп'ютараў. Акрамя гэтага сэрвіс раздражняе мабільных аператараў, бо карыстальнікі замест тэлефанавання праз звыклы галасавы сервіс выкарыстоўваюць IP-тэлефанію.
Зрэшты, самі стваральнікі Viber пакуль не маюць ніякага прыбытку ад праграмы. Аднак яны не хаваюць: вялікія грошы атрымліваецца эканоміць дзякуючы найманню беларускіх праграмістаў. І інвестыцыям ананімнага золатаздабытчыка.
«У Тэль-Авіве таленавіты праграміст абышоўся б у 130 000 зялёных у год», — кажа адзін са стваральнікаў праграмы Талман Марка. Гэтай самай сумы дастаткова, каб заплаціць адразу сямі беларускім спецыялістам.Зрэшты, менавіта гэта яны і робяць.
І не толькі яны. Адзначаецца, што паслугамі беларускіх праграмістаў-аўтсорсераў карыстаюцца сотні заходніх кампаній. Сярод іх «Кока-кола», Google, Siemens, Mercedes-Benz, Samsung, Bosch і іншыя буйныя кампаніі.
Цяпер каманда беларускіх распрацоўшчыкаў дарабляе версіі для пакуль яшчэ не ахопленых праграмай мабільных аперацыйных сістэм. Да ўжо падтрымліваемых iOS, Android, BlackBerry хутка дададуцца S40, Symbian і Bada.
Каментары