10 тыс. чалавек падпісаліся за ўнясеньне зьмяненьняў у закон «Аб свабодзе сумленьня і рэлігійных арганізацыях»
За перыяд з 22 красавіка па 16 мая ў Беларусі сабрана больш за 10 тысяч подпісаў за ўнясенне змяненняў у закон «Аб свабодзе сумлення і рэлігійных арганізацыях».
Як паведаміў БелаПАН прэс‑сакратар каардынацыйнага цэнтра кампаніі па абароне правоў на свабоду сумлення Сяргей Луканін, яе прамежкавыя вынікі былі агучаны на пасяджэнні цэнтра, якое адбылося 16 мая ў Мінску. Паводле яго слоў, кампанія праходзіць больш чым у 30 гарадах краіны. «Удзельнікі пасяджэння адзначылі ўзмацненне ціску на вернікаў, аб чым сведчыць забарона на свяшчэнаслужэнне клірыка Свята‑Пакроўскай праваслаўнай царквы сталіцы айца Аляксандра Шрамко і высылка з Беларусі замежных святароў. Так, з канца мінулага года па гэты час з краіны высланы больш за 25 замежных місіянераў. Прычым большасці з іх інкрымінуецца дзейнасць, якая пагражае нацыянальнай бяспецы Беларусі. Удзельнікі пасяджэння звярнулі ўвагу на тое, што гэтая фармулёўка выкарыстоўваецца з 2001 года ў сувязі з прыняццем канцэпцыі нацыянальнай бяспекі, дзе дзейнасць замежных рэлігійных арганізацый і святароў на тэрыторыі краіны ўяўляе сабой пагрозу нацыянальнай бяспецы Беларусі ў гуманітарнай галіне», — сказаў С.Луканін.
Паводле яго слоў, кампанія па зборы подпісаў выходзіць за рамкі рэлігійных арганізацый і набывае ўсё больш грамадзянскі характар. «У сваім выступленні епіскап Аб’яднання абшчын хрысціян поўнага Евангелля ў Рэспубліцы Беларусь Вячаслаў Ганчарэнка нагадаў словы аднаго з заснавальнікаў ЗША Бенджаміна Франкліна аб тым, што «чалавек, які заяўляе аб неабходнасці абмежавання свабоды для іншых, недастойны свабоды для сябе». Тым самым епіскап падкрэсліў каштоўнасць свабоды для кожнага грамадзяніна Беларусі», — зазначыў С.Луканін.
Нагадаем, што арганізатары кампаніі разлічваюць сабраць не менш за 50 тысяч подпісаў пад адкрытым зваротам да кіраўніка дзяржавы, Канстытуцыйнага суда, Палаты прадстаўнікоў Нацыянальнага сходу з заклікам прывесці ў адпаведнасць з Канстытуцыяй закон «Аб свабодзе сумлення і рэлігійных арганізацыях», які дзейнічае з канца 2002 года.
Фота photo.bymedia.net
Сусветная зорка Джэйсан Дэрула заехаў у Беларусь. Прэм’ер Турчын вадзіў яго па Доме ўрада8
Каментары