Relacyi z «Dažynak» chavajuć pravalny stan sielskaj haspadarki: namałot zbožža skłaŭ 92% ad letašniaha, zbor bulby — 63%. Ale
ŭ televizary ličby praciahvajuć raści.
Uborka skončanaja. Pavodle źviestak abłsielhascharčaŭ, źmieščanych na sajtach abłvykankamaŭ, sialanie Mienščyny sabrali 1,649 młn t, Haradzienščyny — 1,319 młn t, Bieraściejščyny — 1,002 młn t, Homielščyny — 0,915 młn t, Mahiloŭskaja vobłaść i Viciebščyna sabrali najmienš — 0,872 młn t i 0,599 młn t adpaviedna. Razam vychodzić 6,356 młn t, što nie daciahvaje da abiacanych siami miljonaŭ. Dziaržaŭnaje ahienctva BiełTA 4 kastryčnika padało ličbu 6,355 młn t. Ale prapahandystam hetaha zdałosia mała. Prezydenckaja hazeta vydała na pieršaj pałasie, što ŭradžaj skłaŭ ažno 7,025 tys. tonaŭ!
Apošniaja ličba vyklikaje lohki śmiech, jak i bieraściejskija 1,002. Dziaržaŭnyja ŚMI stvarajuć «paralelnuju realnaść», jakaja nia maje ničoha supolnaha z sapraŭdnym stanam spravaŭ. U narodzie pra heta kažuć: «najbolš namałaciŭ televizar».
Homielskamu Kamitetu dziaržkantrolu chapiła śmiełaści pastavić źviestki pra rekordny ŭradžaj pad sumnieŭ.
Kantralory ź viedamstva Tozika vyjavili, što Akciabrski rajonny kamitet sielskaj haspadarki i charčavańnia adrapartavaŭ, što pry kancy žniŭnia na prysiadzibnych učastkach skošana 15 hiektaraŭ pasievaŭ i namałočana 257 ton zbožža. Vychodzić, što siaredniaja ŭradžajnaść pieravysiła 171 centner z hiektara, a takoha niama ni ŭ adnoj krainie śvietu. Akazvajecca, tony prybavili, na hiektary — «zabylisia». Toje ž i na Žytkaviččynie, dzie, pavodle źviestak rajsielhascharču, na prysiadzibnych učastkach sabrali ažno 797 c/ha.
Prypiski dziaržkantralory vyjavili ŭ Kalinkavickim, Rečyckim, Homielskim, Buda-Kašaloŭskim rajonach. Pavodle ichnaj infarmacyi, skažeńnie aperatyŭnych źviestak adbyvałasia na ŭsich uzroŭniach — ad kałhasaŭ da abłsielhascharču.
Aficyjnaja prapahanda davodzić, što ŭradžaj atrymany vydatny. A.Łukašenka navat zajaviŭ, što «my stvaryli novuju sielskuju haspadarku». Statystyka piarečyć: na pakazčyki minułaha hodu viaskoŭcy nia vyjšli. Namałot zbožžavych kołasavych kultur skaraciŭsia na 8%, zierniebabovych — na 10%, pryznavała BiełTA 4 kastryčnika. Uradžajnaść upała z 33,4 da 31,9 c/ha. Mienš sabrali žyta, jačmieniu, aŭsu, trycikale. Tolki pšanicy trochi bolš, čym letaś.
Da taho ž, sioleta Biełaruś napatkaŭ nieŭradžaj bulby, jaje nakapana 566 tys. t (letaś — 900 tys. t). Najbolšaje źnižeńnie ŭradžaju zafiksavana na Mienščynie j Bieraściejščynie (na 49% i 44% adpaviedna). Pamienieła i ahulnaja ŭradžajnaść: 150 centneraŭ z hiektara suprać 192 c/ha letaś.
Ale na «Dažynkach-2005» pra heta nie śpiavali. Na ŭpryhožvańnie Słucku było vydatkavana 122 młrd. Biudžet nastupnych «Dažynak» u Babrujsku składzie až 150 młrd.
Litoviec Vitalijus Mockus zaniaŭ pasadu Stryžaka ŭ «Bajsole». Chto heta taki?34
Kamientary