U Hrodnie na rynku «Paŭdniovy» pradprymalniki masava zastupilisia za «achviaru» pravierki
Ranicaj 3 lutaha ŭ Hrodnie na Paŭdniovym rynku zdaryŭsia kanflikt pamiž padatkovymi inśpiektarami i pradprymalnikami, jakija tam handlujuć.
Pryčynaj kanfliktu pasłužyła raptoŭnaja pravierka padatkovaj inśpiekcyi. «Nakolki ja viedaju, stolki kantraloraŭ nikoli nie było, jany praviarali vybaračna. Kažuć, što ŭ adnaho pradprymalnika kanfiskavali tavar na 40 miljonaŭ rubloŭ», — raskazaŭ BiełaPAN miascovy hramadski aktyvist, jaki staŭ vidavočcam kanfliktu.
Pavodle infarmacyi hrodzienskaha internet-resursa 015.by, kanflikt razhareŭsia prykładna ŭ 7.30 padčas pravierki padatkovymi inśpiektarami pradprymalnika, jaki handluje džynsami.
«Natoŭp pačaŭ źbiracca i hučna aburacca paśla taho, jak padatkovaja, vyjaviŭšy parušeńni, pryniała rašeńnie kanfiskavać tavar. Pavodle niepaćvierdžanaj infarmacyi, padatkovyja inśpiektary nie pakazali pradpisańnie dla praviadzieńnia pravierki», — paviedamlaje sajt. Na rynku da taho času sabrałasia kala 300—400 čałaviek.
Na miesca zdareńnia była vyklikana milicyja. «Kali pieršy narad milicyi padyšoŭ da paviljona, hrodziency pačali hučna plaskać i kryčać, kab jany aryštavali padatkovych inśpiektaraŭ. Pradprymalniki zakryli handlovyja punkty i aburalisia, što im nie dajuć narmalna pracavać. Adzin ź siłavikoŭ sprabavaŭ supakoić ludziej i rastłumačyć situacyju. Prykładna ŭ 10.20 supacoŭniki milicyi ŭviali pradprymalnika, u jakoha vyjavili parušeńni ŭ handli džynsami. Pavodle čutak, parušeńni byli vyjaŭleny nie ŭ prodažy džynsaŭ, a ŭ prodažy kurtak — pradprymalnik nie zmoh pakazać dakumienty, jakija śviedčać ich kuplu», — piša internet-resurs.
Bližej da abiedu pradprymalniki razyšlisia — siońnia na rynku aptovy dzień, jon doŭha nie pracuje.
Ciapier čytajuć
Ninu Bahinskuju vyzvalili biez pakarańnia, kryminalnuju spravu zakryli2
Kamientary