«Dla mianie isnujučyja hierb i ściah śviatyja» — Vandarjeva była zmušana apraŭdvacca za «Pahoniu»
Niadaŭna «Naša Niva» apublikavała fota sa zboraŭ u Tajłandzie, dzie na zorcy biełaruskaha muaj-taj Kaciarynie Vandarjevaj była nadzieta sakołka z našym histaryčnym hierbam «Pahonia».
Materyjał sabraŭ šmat zachoplenych kamientaryjaŭ, ale, vidać, praź niejkaha durnia naškodziŭ samoj Kaciarynie.
Na dniach jana apublikavała na svajoj staroncy ŭ Fejsbuku voś taki dopis.
«Chaču raźviejać niekatoryja brudnyja čutki pa mianie, jakija aktyŭna «hulajuć» na prastorach internetu ŭ apošnija dni, — piša Vandarjeva. — Niadaŭna na staronkach niekatorych apazicyjnych haziet i internet-partałaŭ źjaviŭsia artykuł, dzie vykarystanyja maje fota. Sens artykułaŭ nastupny: Vandarjeva nosić majku z hierbam «Pahonia» i, značyć, jana «naša» — «apazicyjanierka». Dalej idzie spasyłka na «Instahram» adnaho dziŭnaha čałavieka, jaki hetyja fota znajšoŭ u internecie i «patrebnym» čynam prakamientavaŭ.
«Dyk voś, ja nie maju nijakaha dačynieńnia ni da apazicyi, ni da hierba «Pahonia» jak jaje simvała. Nijakim bokam ja nikoli nie kranała palityki i suvienirnaja pradukcyja na mnie nikoli nie mieła dačynieńnia da hierba «Pahonia» ŭ płanie apazicyi. Ja zajmajusia sportam, dabračynnaściu, svaim asabistym žyćciom, pracaj, čaho i ŭsim žadaju. A tym, chto sočyć za maimi intervju ŭ tym liku i na rasijskich sajtach, vielmi nastojliva prašu čytać tolki tyja artykuły, jakija ja sama asabista vykładvaju ŭ sacyjalnyja sietki, bo 60% «intervju sa mnoj» źjaŭlajucca poŭnaj vydumkaj žoŭtych ŚMI», — praciahvaje baksiorka.
«Hetyja ŚMI nie źviartajuć nijakaj uvahi na fota, jakoje ŭžo niekalki hadoŭ staić na hałoŭnaj staroncy ŭ mianie ŭ Fejsbuku, i jakoje vidavočna supiarečyć tamu, što jany prydumlajuć, zapisvajučy mianie ŭ šerahi apazicyi.
Sprabujučy damahčysia papularnaści i atrymać zamiežnyja hranty, zmahajučysia «z dyktaturaj», hetyja ŚMI nie hrebujuć vykarystoŭvać chłuśniu i paklop. Sprabujuć znajści PALITYKU navat tam, dzie jaje niama i być nie moža».
«Dla mianie isnujučy hierb, ściah i himn majoj krainy śviatyja, dla ich demanstracyi ja vyjhravała čempijanaty. A ŭsio astatniaje — chłuśnia i vydumki niaŭdačnikaŭ ŭ žyćci i palitycy».
«Voś cikava, heta moj list hetyja ŚMI apublikujuć ci nie?», — zadajecca pytańniem Kaciaryna naprykancy dopisa.
List Vandarjevaj jaje frendy jak Ukantakcie, tak i ŭ fejsbuku sustreli pieravažna maŭčańniem.
Adzin z fanaŭ spartoŭki adreahavaŭ tak: «Kaciaryna, my ŭsio adno ciabie lubim i cenim! I razumiejem, čamu ty heta napisała. Pieramahaj! My prosta zachaplajemsia ludźmi, jakija šanujuć našyja nacyjanalnyja simvały i prasłaŭlajuć Biełaruś. Vialikaja pavaha za toje raniejšaje fota. Zyčym dalejšych pośpiechaŭ na spartyŭnaj nivie!».
Ciapier čytajuć
«Vajna ŭsio śpiša». Biełaruskim udzielnikam hiej-prajda ŭ Vilni pahražali raspravaj ad imia biełaruskich vajaroŭ za vykarystańnie bieła-čyrvona-biełaha ściaha123
Kamientary