Rasiejskija biznesoŭcy-apazicyjaniery praviali supolnuju pres-kanfierencyju.
Były suŭładalnik sietki sałonaŭ mabilnaj suviazi «Jevrosieť» Jaŭhienij Čyčvarkin zojmiecca pazicyjanavańniem hramadskaj arhanizacyi «Adkrytaja Rasieja», zasnavalnikam jakoj źjaŭlajecca Michaił Chadarkoŭski paviedamlaje Newsru.com.
Pra heta Čyčvarkin paviedamiŭ na supolnaj pres-kanfierencyi z eks-kiraŭnikom JUKOSa, jakaja prajšła ŭ paniadziełak u Łondanie, dzie ciapier žyvuć abodva biznesoŭcy. «Adkrytaja Rasieja» viała tranślacyju imprezy, pryśviečanaj budučym vieraśnioŭskim vybaram.
«Zajmusia pracaj nad prahramaj, brendynham i pazicyjanavańniem arhanizacyi. Ja pasprabuju zrabić usio, kab tyja dumki, jakija tut naradžajucca, dajšli da kožnaha rasiejca jak alternatyva isnaha śvietapohladu», — zajaviŭ Čyčvarkin.
Michaił Chadarkoŭski sa svajho boku vykazaŭ spadziavańnie, što z prychodam Čyčvarkina kamunikacyi «Adkrytaj Rasiei» z hramadstvam palepšacca. «Heta toje, što jon umieje rabić lepš za ŭsio», — miarkuje eks-kiraŭnik JUKOSa. Pavodle słoŭ Chadarkoŭskaha, «napracoŭki Čyčvarkina z nahody bačańnia budučyni pojduć u ahulnuju skarbonku».
«Vielmi važna mienavita, kab 89% nasielnictva mieli dostup da spres alternatyŭnaha bačańnia śvietu. Naša zadača ź Michaiłam Barysavičam hetyja viedy danieści», — raspavioŭ Čyčvarkin, nazvaŭšy heta «rasšyranym navučańniem».
Anansujučy pres-kanfierencyju, Chadarkoŭski i Čyčvarkin raniej zajavili, što ichniaja meta - «u paraŭnalna niedalokaj histaryčnaj pierśpiektyvie damahčysia sychodu Pucina i jahonych siabroŭ ad ułady, zapuścić palityčny praces u Rasiei i zabiaśpiečyć pieršyja absalutna adkrytyja, sumlennyja vybary». Na ichniuju dumku, z momantu sychodu ciapierašniaj ułady dla stvareńnia patrebnych varunkaŭ praviadzieńnia takich vybaraŭ spatrebiacca dva hady. Za hety čas miarkujecca pravieści šerah reformaŭ, u tym liku — palityčnuju, sudovuju i šerah ekanamičnych.
Pryznaŭšy, što ŭ ich roznyja palityčnyja pohlady, Chadarkoŭski i Čyčvarkin zajavili, što adčuvajuć «pilnuju patrebu abjadnańnia ŭsich nieabyjakavych sił, kab zrabić Rasieju svabodnaj i adkrytaj». «2017 hod blizka, nadyšoŭ čas viarnuć hetuju ziamlu sabie», — padahulnili jany, majučy na ŭvazie 100-hodździe Kastryčnickaj revalucyi.
Na pres-kanfierencyi ŭ paniadziełak Chadarkoŭski raspavioŭ ab prajekcie «Adkrytyja vybary», jaki byŭ zapuščany 22 studzienia 2016 hoda. «Adkrytaja Rasieja» abviaściła, što padtrymaje na budučych vybarach u vieraśni ŭ Dziaržaŭnuju dumu 20—25 kandydataŭ u adnamandatnych akruhach. Paviedamlałasia, što pa dapamohu da «Adkrytaj Rasiei» ŭžo źviarnulisia jak biespartyjnyja hramadzianie, tak i pradstaŭniki parłamienckich partyj.
Na pačatku krasavika stała viadoma, što pastupiła blizu 300 zajavak. U tym liku, pavodle źviestak «Adkrytaj Rasiei», pa dapamohu źviarnulisia bolš jak dziasiatak «adzinarosaŭ». Ab płanach abiracca pry padtrymcy «Adkrytych vybaraŭ» zajavili siabra «Spraviadlivaj Rasiei» Volha Žakava, žurnalistka Julija Juzik, lidar Libiertaryjanskaj partyi Rasiei Andrej Šalnieŭ, sustaršynia ParNaS u Sankt-Pieciarburhu Andrej Pivavaraŭ, supracoŭnica «Adkrytaj Rasiei» Maryja Baronava.
«Vykarystać (vybary) možna i treba ŭ ramkach palityka-adukacyjnaha prajekta, u ramkach jakoha my, rasiejcy, ubačym novych maładych palitykaŭ», — skazaŭ Chadarkoŭski.
Na pres-kanfierencyi było zakranutaje pytańnie ab mahčymaści supracoŭnictva «Adkrytaj Rasiei» z Demakratyčnaj kaalicyjaj. Jak zajaviŭ Chadarkoŭski, «supracoŭnictva nie tolki mahčymaje, jano idzie». Jon adznačyŭ, što razhladaje hetyja vybary jak prajekt, u ramkach jakoha maksimalnaja kolkaść maładych palityčnych lidaraŭ pavinna atrymać mahčymaść prezentavać svaje pohlady. «My ŭ hetym sensie možam tolki dapaŭniać adzin adnaho, a nie kankuravać», — padkreśliŭ eks-kiraŭnik JUKOSa.
Parłamienckija vybary adbuducca ŭ Rasiei 18 vieraśnia 2016 hoda. Zhodna ź dziejnym rasiejskim zakanadaŭstvam, z 450 mandataŭ deputataŭ Dziarždumy pałova raźmiarkoŭvajucca pamiž śpisami palityčnych partyj, jakija atrymali ŭ vyniku hałasavańnia vybarščykaŭ bolš za 5% hałasoŭ. Astatni skład nižejšaj pałaty parłamienta budzie sfarmavany ź pieramožcaŭ vybaraŭ u adnamandatnych akruhach.
U adziny dzień hałasavańnia 18 vieraśnia taksama projduć vybary kiraŭnikoŭ vaśmi rehijonaŭ i vybary deputataŭ zakanadaŭčych orhanaŭ dziaržaŭnaj ułady ŭ 38 subjektach RF.
Ciapier čytajuć
Kaleha pamierłaha vykładčyka Ščukina: Jaho kinuła žonka ź dziećmi, pačałasia depresija. U vyniku zvolnili za prahuły6
Kamientary