Kiepskaja navina: novy karanavirus pieradajecca ad čałavieka da čałavieka jašče ŭ inkubacyjny pieryjad

Nośbit karanavirusa 2019-nCoV, uspyška jakoha pačałasia ŭ Kitai, robicca zaraznym jašče da źjaŭleńnia pieršych simptomaŭ chvaroby, u inkubacyjny pieryjad, jaki doŭžycca ad 1 da 14 dzion.

Pra heta zajaviŭ kiraŭnik Dziaržaŭnaha kamiteta pa spravach achovy zdaroŭja Kitaja Ma Siaovej na pres-kanfierencyi ŭ Piekinie ŭ niadzielu.

Heta kiepskaja navina. Bo ŭvodzić zachady prafiłaktyki ciažej, kali chvarobu mohuć pieranosić taksama vonkava zdarovyja ludzi.

Kitaj znachodzicca ŭ krytyčnym momancie baraćby z uspyškaj pnieŭmanii, vyklikanaj karanavirusam novaha typu, cytuje Ma Siaaveja kitajskaje infarmacyjnaje ahienctva Sińchua.

Kitajskija ŭłady padoŭžyli vychadnyja, źviazanyja sa śviatam viasny — kitajskim Novym hodam, kab ludzi pakul nie viartalisia na pracoŭnyja miescy.

Pa stanie na ranak paniadziełka, ułady Kitaja paviedamili pra 2700 zarehistravanych vypadkaŭ karanavirusa i 80 pamierłych ad jaho. Niekatoryja miarkujuć, što hetyja ličby zanižanyja, a realna jany našmat vyšejšyja. U kitajskich sacyjalnych sietkach kružać vyjavy balnic u pravincyi Chubej, pierapoŭnienych pacyjentami. Narastaje taksama abureńnie deficytam praduktaŭ va Uchani i rostam cen na ich.

Hankonh zabaraniŭ ujezd žycharam pravincyi Chubej. ZŠA, Japonija, Francyja, Aŭstralija, a taksama i Biełaruś robiać zachady dla poŭnaj evakuacyi svaich hramadzian z Uchania i pravincyi Chubej.

Čytajcie taksama: Biełaruskaje pasolstva ŭ Kitai prapanuje dapamohu biełarusam, jakija chočuć vyjechać z pravincyi Chubej

Kab pakazać surjoznaść situacyi, premjer Kitaja Li Kecian naviedaŭ horad Uchań.

Ułady Kitaja painfarmavali Suśvietnuju arhanizacyju achovy zdaroŭja (SAAZ) ab uspyšcy pnieŭmanii nieviadomaha typu va Uchani jašče 31 śniežnia 2019 hoda. Jak paźniej vyjavili, pieršy čałaviek zachvareŭ na karanavirus ŭ pačatku śniežnia 2019 hoda. Choć ličycca, što asiarodkam raspaŭsiudžańnia infiekcyi staŭ adzin z rynkaŭ Uchania, pieršy chvory jaho nie naviedvaŭ, i nivodzin z členaŭ jaho siamji na hryp ci VRVI nie chvareŭ, piša Rojterz.

Zafiksavanyja šmatlikija vypadki zaražeńnia miedpiersanału ad chvorych na karanavirus.

Uzbudžalnik chvaroby (karanavirus 2019-nCoV) byŭ identyfikavany 7 studzienia. Jon taksama vyjaŭleny ŭ Aŭstralii, Vjetnamie, Małajzii, Respublicy Kareja, Sinhapury, ZŠA, Tajłandzie, Francyi i Japonii. SAAZ pryznała ŭspyšku nacyjanalnaj nadzvyčajnaj situacyjaj dla Kitaja, ale pakul ŭstrymałasia ad abviaščeńnia režymu mižnarodnaj nadzvyčajnaj situacyi.

Tym časam kitajskija miedyki identyfikavali i vystavili ŭ svabodny dostup hienietyčny kod novaha karanavirusu. Ciapier navukoŭcy roznych krain śvietu mohuć pracavać nad stvareńniem vakcyny ad novaj zarazy, navat nie majučy ŭ svaich łabaratoryjach uzoru virusu, paviedamlaje Rojterz. Imavierna, heta značna paskoryć čas raspracoŭki vakcyny.

• 0
• 0
• 0
• 0
• 0
• 0
• 0
• 0