«Likvidacyja ahientaŭ upłyvu». Čynoŭnikam raskazvajuć, jak treba źmianić ideałohiju ŭ Biełarusi
Jak stała viadoma «Našaj Nivie», u dziaržaŭnych viedamstvach i arhanizacyjach pravodziacca tłumačalnyja sustrečy, dzie havorycca pra toje, jak treba źmianić ideałohiju ŭ krainie, kab supraćdziejničać ekstremizmu i hramadska-palityčnaj napružanaści. Siarod zachadaŭ — uzmacnieńnie kryminalnaj adkaznaści ŭ dačynieńni da «miaciežnikaŭ», likvidacyja sietki hramadskich arhanizacyj (ich nazyvajuć ahientami ŭpłyvu), pavyšeńnie roli dziaržaŭnych ŚMI na fonie zakryćcia «apazicyjnych» sajtaŭ.
Siarod źmienaŭ u ideałahičnaj daktrynie adznačajecca, što ŭ novaj Kanstytucyi nie pavinna być pałažeńnia ab niejtralitecie. Uziaty kurs na ŭzmacnieńnie adkaznaści (i administracyjnaj, i kryminalnaj) za pratestnyja akcyi, u tym liku za aktyŭnaść u internecie.
Dziejańni ŭładaŭ pa padaŭleńni pratestaŭ pavinny być zamacavanyja ŭ zakonach, nakiravanych na abaronu suvierenitetu i kanstytucyjnaha ładu.
U lipieni 2021-ha ŭłady ŭziali kurs na začystku niedziaržaŭnych hramadskich arhanizacyj, u tym liku tych, jakija svajoj dziejnaściu zakryvali častku sacyjalnych pytańniaŭ, jakija pavinna vyrašać dziaržava. Naprykład, spyniła svaju dziejnaść haračaja linija dapamohi achviaram chatniaha hvałtu.
Była zakrytaja płatforma «Imiony», dzie źbirali hrošy i dla prajektaŭ arhanizacyj, łajalnych da dziaržavy («Čyrvony kryž» ci «Biełaruski dziciačy chośpis»).
Adnak, pavodle transfarmacyi ideałahičnaj daktryny, zakručvańnie hajek tolki praciahniecca, na mecie staić likvidacyja sietki NKA — ahientaŭ upłyvu.
Ideołahi vierać, što možna pavysić upłyŭ dziaržaŭnych ŚMI ŭ hramadstvie. Dla hetaha treba «zakryć sietku apazicyjnych sajtaŭ».
Ideałahičnuju pracu taksama płanujuć uzmacniać u škołach i va ŭniviersitetach. I napieradzie nas jašče čakaje pierapracoŭka kancepcyi nacyjanalnaj biaśpieki, papiaredniaja była pryniataja ŭ 2010 hodzie.
Hałoŭny ideołah armii zajaviŭ, što biełarusy pavinny hanarycca tym, što nie haładajuć
Ułady znoŭ uzialisia za nacyjanalnuju ideju. Abiacajuć sfarmulavać da 2023 hoda
Litoviec Vitalijus Mockus zaniaŭ pasadu Stryžaka ŭ «Bajsole». Chto heta taki?34
Kamientary