U Homieli pačaŭsia sud nad kampanijaj siabroŭ, jakuju nazvali «śpiačaj jačejkaj». Jany stvaryli čat u padtrymku Ukrainy
U Homielskim abłasnym sudzie 6 lutaha pačaŭsia sudovy praces nad tryma hamielčukami, jakich abvinavačvajuć adrazu pa niekalkich «palityčnych» artykułach: «Sadziejničańnie ekstremisckaj dziejnaści» (častki 1 i 2 artykuła 361 KK), «Stvareńnie ekstremisckaha farmavańnia abo ŭdzieł u im» (art. 361 č. 1), a taksama abrazu Łukašenki (art. 368 č. 1), piša «Fłahštok».
Praces prachodzić u zakrytym režymie, tamu sutnaść abvinavačańnia nieviadomaja. Zhodna z raskładam suda, spravu razhladaje sudździa Aleh Charoška.
Abvinavačanyja — Źmicier Papkoŭ, Ihar Čarnavusaŭ, Uładzimir Kamienaŭ — užo amal hod znachodziacca ŭ źniavoleńni: stolki doŭžyłasia śledstva. Ich i jašče adnaho hamielčuka žorstka zatrymali ŭ sakaviku 2023 hoda. Tady siłaviki zrabili spravazdaču ab raskryćci «złačynnaj hrupy», jakaja źbirałasia ŭ haražnym kaapieratyvie, jakuju nazvali «śpiačaj jačejkaj ekstremistaŭ».
Na milicejskim videa było pakazana, jak hrupa siłavikoŭ u poŭnym abmundziravańni ŭvachodzić u budynak i kładzie tvaram u padłohu adnaho z mužčyn. U dokaz ich «viny» pakazali bieł-čyrvona-bieły ściah, namalavany na ścianie haraža, naniesieny farbaj na cehłu hierb «Pahonia» i partret Če Hievary.
Siabroŭ prymusili zapisać videa i skazać ab tym, što jany stvaryli čat, dzie pierapisvalisia pamiž saboj, a paśla ŭvarvańnia RF va Ukrainu nibyta niekalki razoŭ u pierapiskach abrazili Łukašenku, taksama pisali «niapravilnyja» kamientary.
Jašče adno abvinavačańnie — chłopcy «mieli źniešnija suviazi» ź biełaruskimi dobraachvotnikami, jakija vajujuć za Ukrainu. Sudziačy pa ŭsim, mienavita heta stała padstavaj dla ŭzbudžeńnia kryminalnaj spravy pa artykule «Sadziejničańnie ekstremisckaj dziejnaści».
Sudziać traich chłopcaŭ, los čaćviortaha nieviadomy. Usie jany rodam z Homiela i, zychodziačy z pastoŭ u sacsietkach, daŭno siabravali, razam udzielničali ŭ mižnarodnaj hulni ŭ Beer Pong u Homieli. Ciapier im pahražaje šmathadovaje źniavoleńnie.
Ciapier čytajuć
Łukašenka: Raman Pratasievič — daŭni supracoŭnik biełaruskaj raźviedki36
Kamientary
Nužien momient, kohda budilnik zazvonit!
Jeŝio łučšie - kołokoł!