U Biarezinskim zapaviedniku pračynajucca miadźviedzi. Ale rabotniki zazirnuć u adnu ź biarłoh nie navažylisia
Rabotniki Biarezinskaha bijaśfiernaha zapaviednika vyjavili ślady niekalkich miadźviedziaŭ, što havoryć pra pačatak vychadu hetych žyvioł ź zimovaj śpiački. Pra heta BiełTA paviedamiła načalnik navukovaha adździeła pryrodaachoŭnaj ustanovy Anastasija Ryžkova.
«Padčas zimovych maršrutnych ulikaŭ u lutym byli znojdzieny ślady miadźviedziaŭ, ale my nie možam skazać, što ŭsie jany pračnulisia kančatkova. U pieryjad zimovych adlih biarłohi padtaplajucca, žyvioły ŭstajuć i šukajuć suchoje miesca. Ich ślady znachodziać.
Potym umovy nadvorja mohuć źmianicca, znoŭ vypadaje śnieh, prychodziać marazy, miadźviedzi znoŭ zalahajuć u śpiačku. U kancy lutaha, kali była adliha i nazirałasia viasnovaje krasavickaje nadvorje, byli znojdzieny ślady pieršych abudžanych burych miadźviedziaŭ — adnoj abo dźviuch asobin, jašče adnoj — u pačatku sakavika», — skazała jana.
Son miadźviedzia ŭ siarednim zajmaje try-čatyry miesiacy (čaściej sa śniežnia pa sakavik uklučna) i praciahvajecca da pačatku viasnovaj kapieli. Adnak supracoŭniki Biarezinskaha zapaviednika vyjaŭlali kasałapych, što nie śpiać, i ŭ siaredzinie hetaha pieryjadu.
Adnaho buraha fotapastka zafiksavała 3 śniežnia 2022 hoda, druhi trapiŭsia na kamieru ŭ kancy studzienia 2023-ha.
«Niadaŭna była znojdziena biarłoha miadźviedzia, ale našy supracoŭniki nie ryzyknuli ŭ jaje zazirnuć, pakolki zastavałasia vialikaja vierahodnaść, što žyviolina znachodziłasia ŭnutry, — patłumačyła Anastasija Ryžkova. — Miadźviedź zvyčajna łamaje halinki, padściłaje paciaruchu ź liścia pad karaniami albo vyviernutym drevam, pobač ź vialikimi drevami, i robić sabie hniazdo-budančyk.
U vakolicach našaha administratyŭnaha centra žyvie niekalki miadźviedziaŭ. Zvyčajna stavim fotapastku na ich šlachu. U adnym miescy vychodzić adzin i toj ža miadźviedź — samiec-vołat, jakoha prazvali Čarnyšom z-za charakternaj afarboŭki. Sioleta jon jašče nie vyjšaŭ: nie było fiksacyi fotapastak i śladoŭ u miescy, dzie źvier zvyčajna abychodzić svaju terytoryju».
U zapaviedniku i na terytoryi palaŭničych haspadarak, jakija prymykajuć da ich, žyvie da 75 burych miadźviedziaŭ z ulikam maładniaku.
U lesie pad Viciebskam znajšli kinutych miedźviedzianiataŭ
Dva hady tamu ŭ Biełarusi vyratavali miedźviedziania, što zastałosia biez mamy. Što ź im ciapier?
«Kolkaść miadźviedziaŭ hałapuje ŭ našaj krainie». Šunievič prapanavaŭ šlachi vyrašeńnia prablemy
Na Paleśsi miadźviedź razhramiŭ pasieku i źjeŭ 30 kiłahram miodu
Ci časta miadźviedzi ŭ Biełarusi napadajuć na ludziej?
«Ja chaču spraviadlivaści — i dla žančyn, i dla siabie». Ščyraja hutarka z Andrejem Stryžakom pra skandał z dykpikami, zaležnaści i budučyniu14
Kamientary