Pavodle novaha zakona, niebiaśpiečnym sabakam moža być pryznany navat špic
Zakon pra adkaznaje abychodžańnie z žyviołami, jaki ŭstupiŭ u siłu z 1 studzienia, vyznačaje katehoryi sabak-kampańjonaŭ. Zaraz niebiaśpiečnym mohuć pryznać navat na pieršy pohlad biaskryŭdnaha sabaku.
Pa raniejšaj kłasifikacyi chatnija sabaki adnosilisia albo da «zvyčajnych», albo da niebiaśpiečnych parod. Pieralik z 40 takich parod zaćviardžaŭ Minsielhascharč.
Paśla pryniaćcia novaha zakona ŭsio źmianiłasia. Jak raskazaŭ načalnik jurydyčnaha adździeła ŽEU №3 Pieršamajskaha rajona Alaksiej Skaldzin, źjaviłasia paniaćcie žyvioł-kampańjonaŭ (uklučajučy sabak-pavadyroŭ i palaŭničych). Ich možna padzialić na niekalki padhrup, pišuć «Minsk-Naviny».
U pieršuju ŭvachodziać parodzistyja sabaki.
U druhuju — niebiaśpiečnyja. Taki status atrymlivajuć hadavancy, kali jany pryčyniajuć škodu žyćciu abo zdaroŭju čałavieka, žyvioły, što ŭstanoŭlena sudovym pastanaŭleńniem abo rašeńniem upaŭnavažanaha dziaržaŭnaha orhana.
U takim vypadku niebiaśpiečnym moža być pryznany navat, da prykładu, pamieranski špic abo čychuachua. Na ŭładalnika ŭskładajucca dadatkovyja abaviazacielstvy pa ich utrymańni i prachodžańni śpiecyjalnych kursaŭ.
Treciaja hrupa — heta tyja, što patrabujuć asablivaj adkaznaści ŭładalnika. Heta sabaki peŭnaj parody, a taksama ich hibrydy i mietysy, jakija vyznačajucca bujnymi pamierami (rost bolš za 70 sm), asablivaj ahresiŭnaściu i ŭklučanyja ŭ adpaviedny pieralik, vyznačany ŭradam. Pakul taki dakumient nie apublikavany, prymianiajecca pieralik patencyjna niebiaśpiečnych parod sabak Minsielhascharču.
Haspadar sabaki, jakaja patrabuje asablivaj adkaznaści, pavinien za try miesiacy z momantu nabyćcia sabaki prajści śpiecyjalnyja kursy i atrymać paśviedčańnie.
«Kali ž sabaka pryznany niebiaśpiečnym, jaho haspadar pavinien prajści kursy na praciahu adnaho miesiaca z dnia ŭstupleńnia siły sudovaha pastanaŭleńnia abo rašeńnia ŭpaŭnavažanaha dziaržaŭnaha orhana», — raskazaŭ juryst.
Pry hetym u zakonie vykładzieny tolki bazavyja vyznačeńni, jakija słuhujuć aryjenciram jak dla ŭładalnikaŭ, tak i dla čynoŭnikaŭ. Detalovyja praviły, instrukcyi, jakija raskryvajuć i ŭdakładniajuć asobnyja pałažeńni, jašče buduć pryniaty.
«Adpraŭlali myć tualety i kidali ŭ ŠIZA». Susiedki raskazali pra abychodžańnie ŭ kałonii z eks-palitźniavolenaj Tamaraj Karavaj, jakaja paśla pamierła33
Kamientary