«Zajechaŭ u kvateru i adkryŭ tam biznes». Jak pakarać šumnaha susieda pavodle zakona?
Minčanka paskardziłasia na šumnaha susieda, jaki vyrašyŭ arhanizavać pradprymalnickuju dziejnaść prosta ŭ zdymnaj kvatery.
Jak možna paŭpłyvać na šumnaha kvataranta i nakolki zakonnaja jaho dziejnaść, rastłumačyli ŭ Leninskim RAUS stalicy, pišuć «Minsk-Naviny».
— Druhaja kvatera na našaj leśvičnaj placoŭcy zdajecca. Niadaŭna ŭ jaje zajechaŭ student, i viečarami da jaho patokam stali prychodzić ludzi. Pryčym zaŭsiody roznyja, i, jak praviła, jany nadoŭha nie zatrymlivajucca, — raskazvaje Ksienija. — Adnojčy muž nie vytrymaŭ biaskoncaha brazhańnia dźviaryma i pacikaviŭsia, što ž tak ciahnie haściej u tuju kvateru. Akazałasia, chłopiec handluje tannymi vejpami i vadkaściami praź internet, a doma vydaje zakazy. Heta zakonna? Ci možna ŭsio heta spynić?
Pavodle słoŭ učastkovaha inśpiektara milicyi Leninskaha RUUS lejtenanta milicyi Mikity Fiłončyka, kolkaść ludziej, jakich možna zaprašać u hości ŭ šmatkvaternym domie, nie abmiežavana. Tym nie mienš, hramadzianie nie pavinny parušać spakoj inšych žycharoŭ.
— Kali hučny huk z-za rezkaha zakryćcia dźviarej praciahvajecca paśla 23:00 abo pačynajecca raniej za 07:00, to heta ličycca parušeńniem Praviłaŭ karystańnia žyłymi pamiaškańniami, što ciahnie administracyjnuju adkaznaść pavodle č. 1 art. 22.12 KaAP i štraf u pamiery ad 2 da 10 bazavych vieličyń (1 bazavaja — 42 rubli). Chacia vyrašyć prablemu možna mienš radykalnym sposabam: časam dastatkova patłumačyć susiedu, što jaho pavodziny stvarajuć vam niazručnaści. Kali heta nie dapamoža, źviarniciesia pa dapamohu da svajho ŭčastkovaha padčas pryjomu hramadzian abo apišycie prablemu ŭ čat-bocie «Zvarotnaja suviaź Minskaj Milicyi aficyjny». Supracoŭnik praviadzie prafiłaktyčnuju hutarku, vyniesie papiaredžańnie abo składzie pratakoł, — patłumačyli ŭ RUUS.
Kamientary
"Pavodle słoŭ učastkovaha inśpiektara milicyi Leninskaha RUUS lejtenanta milicyi Mikity Fiłončyka, kolkaść ludziej, jakich možna zaprašać u hości ŭ šmatkvaternym domie, nie abmiežavana."
dyk zakonna ci nie?