Internet-vybary lidara apazicyi? Nizy za, viarchi suprać

U Rasii dla hetaha była pracedura rehistracyi i vieryfikacyi vybarcaŭ. Ludzi rehistravalisia pa pašpartach abo dasyłali praź internet kopii pašpartoŭ, kožnamu čałavieku prysvojvaŭsia elektronny kod, pa jakim jon moh prahałasavać tolki adnojčy. Jak Vy dumajecie, heta prymalny dla Biełarusi varyjant?

Andrej Pačobut, žurnalist, aktyvist polskaj nacmienšaści:

Nou-chau, jakija vykarystoŭvaje apazicyja ŭ adnoj aŭtarytarnaj krainie, časta biarecca na ŭzbrajeńnie padobnymi ruchami ŭ inšych krainach. Dumaju, varta ŭvažliva pryhledziecca da rasijskaha sposabu.

Patrebna tolki spałučeńnie asabistaj prystojnaści ź viedami sučasnych technałohij u patencyjnych arhanizataraŭ takoha pracesu. Ale varta pamiatać, što viadomaść i papularnaść u internecie nie zaŭsiody aznačajuć upłyvovaści ŭ reale.

Vital Amialkovič, hramadski aktyvist, Słuck:

Ideja dobraja, ale, bajusia, režym vykarystaje techničnyja srodki, kab sarvać takija vybary:

buduć ataki na internet-resursy, ukid kampramatu na pretendentaŭ i čalcoŭ taho ž CVK, banalnyja zatrymańni napiaredadni niejkich značnych vystupaŭ ci akcyjaŭ.

Juraś Hubarevič, namieśnik staršyni Ruchu za Svabodu:

Dumaju, varta prydumać niešta novaje — toje, što dazvolić transfarmavać internet-hałasy ŭ realnuju pracu kamandy i rost kolkaści siabroŭ apazicyjnych arhanizacyj.

Inakš i biez taho izalavanaja ad hramadstva apazicyja ryzykuje nazaŭždy zastacca ŭ virtualnaj prastory.

Alaksandr Fiaduta, kaardynatar kampanii «Havary praŭdu»:

Rasija — kraina vialikaja, i inšaj mahčymaści, jak hałasavańnie praź internet, amal što niama. Z majho punkta hledžańnia, abirać budučaha kandydata ŭ prezidenty — adzinaha, na moj pohlad, kandydata — pavinny mienavita tyja, chto buduć paśla źbirać podpisy, raspaŭsiudžvać ulotki, stajać u pikietach, pracavać u pieradvybarčych rehijanalnych štabach.

U nas šmat pavažanych ludziej z apazicyjnymi pohladami, ale ž napieradzie takoje supraćstajańnie, padčas jakoha abirać hienierała pavinna piachota. Kolki štykoŭ ciabie padtrymajuć, stolki hałasoŭ ty i atrymaješ. A kab daviedacca pra kolkaść štykoŭ, treba prajści praź pieradvybarčuju kampaniju — naprykład, praź miascovyja vybary. Tady i pahladzim, chto jość chto i chto moža być adzinym kandydatam. Pačakajem troški. Čas jość.

Viktar Karniajenka, kaardynatar kampanii «Za spraviadlivyja vybary»: Kaardynujučy orhan patrebien dla vyrašeńnia kankretnych palityčnych zadač, naprykład, vyznačeńnia ad apazicyi kandydata na prezidenty. Nie adnojčy ŭžo takija orhany stvaralisia, praŭda, šlacham delehavańnia ŭ jaho paŭnamocnych pradstaŭnikoŭ struktur, jakija pahadžalisia niešta zrabić razam. Tamu

pieršasnaje pytańnie — ci hatovy tut šukać zhodu palityčnyja lidary albo jany i ŭ 2015 hodzie buduć kłapacicca pra ŭłasnyja rejtynhi, «umacavańnie» svaich strukturak ci jak «samazachavacca» da lepšych časoŭ.

Kali hatovy, i heta paćviardžajecca na praktycy, to miechanizmy kaardynacyi mohuć być samyja roznyja, u tym liku i ŭ rasijskim varyjancie. Biez kankretnaj mety stvareńnie niejkich nadbudovaŭ zastaniecca hulnioj. U nas užo byŭ i «kiraŭnik dziaržavy», i «hienprakuror u vyhnańni», i navat ceły paralelny parłamient. I što jano nam dało?

Kali brać arhanizacyju alternatyŭnaha hałasavańnia, to zaŭsiody ŭ takich vypadkach paŭstaje patańnie davieru da takich «vybarčych kamisij».

Mahčyma, dla padvyšeńnia davieru da pracedury treba prasić dałučycca da hetaj spravy našych maralnych aŭtarytetaŭ: Śviatłanu Aleksijevič, Uładzimira Arłova dy inšych.

Siarhiej Sałaš, hramadski aktyvist, Barysaŭ:

Kali b raptam była ahulnaja zhoda na taki miechanizm, to elektronnaje hałasavańnie mieła b sens.

Praŭda, na takoje hałasavańnie nie pahodziacca «adviečnyja dziejačy» i aŭtsajdary. Što da arhanizatara vybaraŭ, to ja b Lipkoviču (papularny błohier) jakomuści davieryŭ by pracu sa skanami pašpartoŭ. Inšym — nie. Padliki pavinny rabić ludzi, jakija nie majuć zacikaŭlenaści ŭ toj ci inšaj palityčnaj hrupcy.

Źmicier Sałaŭjoŭ, inžynier-budaŭnik, pravaabaronca:

Na maju dumku, rasijskaja mietodyka moža być vykarystana ŭ jakaści prajmieryz — vyznačeńnia prykładnaha rejtynhu patencyjnaha kandydata.

Ale tut jość svaje abmiežavańni. Pry hałasavańni na ofisach apazicyjnych struktur i z vykarystańniem interniet-resursaŭ da ŭdziełu buduć pryjaciahnuty tolki peŭnyja sacyjalnyja hrupy (aktyvisty apazicyi, studenty, ofisnyja supracoŭniki), u toj čas jak inšyja sacyjalnyja hrupy buduć mienš pradstaŭlenyja, Dyj zastajecca pytańnie biaśpieki dla vyklučeńnia falsifikacyj. Niaprosta prakantralavać, chto nasamreč hałasuje, bo kody možna i pierachapić. A dostup da kopij pašpartoŭ i pašpartnych źviestak davoli šyroki — my pakidajem dadzienyja šmat dzie: u bankach i ŽESach, naprykład.

Siarhiej Čarnavoki, prahramist, siabar Arhkamiteta Chryścijanskaj Demakratyi:

Ideja prymalnaja, ale lepš takija vybary rabić u časy palityčnaha ŭzdymu, jak było paśla Płoščy.

Ivan Šyła, student: Varta, biezumoŭna.

Kali realizavać takoje, adbudziecca niemahčymaje, apazicyja abjadnajecca. A sama kampanija pa arhanizacyi vybaraŭ — dobraja nahoda pravieryć žyćciazdolnaść struktur. I naohuł, u rasiejskaj apazicyi šmat idejaŭ, jakija varta było b vykarystoŭvać.

Kali havaryć pra hałasavańni, to heta vybary pramoŭcaŭ na mitynhach. A jakija žyvyja tam arhkamitety masavych akcyj! Našyja ž daŭno ničoha supolnaha z hetym nie majuć.

Varyjanty z elektronnaj rehistracyjaj vybarcaŭ prymalnyja. Daŭno para razumieć, što, kali havorka idzie pra sotni i tysiačy asobaŭ, represii suprać takoj kolkaści ludziej niemahčymy.

Utvareńnie CVK možna było b daručyć tym ža pravaabaroncam-viasnoŭcam — u ich jość dośvied arhanizacyjnaj pracy ŭ miežach krainy i vysoki davier z boku ŭsich patencyjna zacikaŭlenych subjektaŭ.

• 0
• 0
• 0
• 0
• 0
• 0
• 0
• 0