Marek Mihalski napisaŭ načalniku turmy, u jakoj siadzić Mikałaj Statkievič

Jeŭradeputat Marek Mihalski adpraviŭ zvarot da načalnika turmy № 4 u Mahilovie i načalnika departamienta vykanańnia pakarańniaŭ MUS Biełarusi z patrabavańniem spynić represii ŭ dačynieńni da byłoha kandydata ŭ prezidenty Biełarusi Mikałaja Statkieviča.

Jak paviedamlaje ofis Mihalskaha, pryčynaj dla zvarotu stała infarmacyja pra toje, što administracyja turmy № 4 u Mahilovie, u jakoj znachodzicca Statkievič, starajecca jaho poŭnaściu izalavać: jamu admaŭlajuć u sustrečy z pravasłaŭnym śviatarom, karespandencyja błakirujecca, pasyłki, haziety i brašury nie dachodziać.

U svaim zvarocie Mihalski padkreśliŭ, što takija dziejańni ŭ dačynieńni da Statkieviča jon rasceńvaje jak naŭmysnaje imknieńnie izalavać źniavolenaha ad źniešniaha śvietu, «kab psichałahična jaho złamać, pazbavić jaho duchoŭnaj padtrymki i stvaryć uražańnie, što pra jaho ŭsie zabylisia i pakinuli na volu losu».

Marak Mihalski zaklikaŭ spynić represii ŭ dačynieńni da Mikałaja Statkieviča i prainfarmavać jaho, čamu administracyja turmy № 4 u Mahilovie ad pravasłaŭnaha Vialikadnia i da siońniašniaha dnia nie dazvoliła Statkieviču sustrecca z pravasłaŭnym śviatarom.

Varta zaznačyć, što tydzień tamu ofis jeŭradeputata pačaŭ kampaniju «Svaboda x 2» — akcyju salidarnaści z dvuma biełaruskimi palityčnymi źniavolenymi — Mikałajem Statkievičam i lidaram mižnarodnaj arhanizacyi «Małady front» (Čechija) Dźmitryjem Daškievičam.

U mai 2011 hoda sud Leninskaha rajona Minska pryhavaryŭ Statkieviča da šaści hadoŭ pazbaŭleńnia voli pavodle abvinavačańnia ŭ arhanizacyi masavych biesparadkaŭ u dzień vybaraŭ prezidenta 19 śniežnia 2010 hoda. Jon adbyvaŭ pakarańnie ŭ škłoŭskaj kałonii № 17, adnak 15 studzienia 2012 hoda byŭ pieraviedzieny ŭ SIZA ŭ Mahilovie. Pryčynaj staŭ aficyjny dakumient administracyi kałonii, zhodna ź jakim asudžany palityk «nie staŭ na šlach vypraŭleńnia», «da ŭmoŭna-daterminovaha vyzvaleńnia nie imkniecca» i paśla adbyćcia pakarańnia maje namier «vieści złačynny ład žyćcia». Pavodle słoŭ žonki palityka, farmalnaj padstavaj dla abvinavačańnia stała toje, što na adzieńni nie było birki z numaram źniavolenaha, jon taksama nie zhadaŭ u śpisie asabistych rečaŭ nasoŭki.

Mikałaj Statkievič — adziny kandydat u prezidenty na vybarach 2010 hoda, jaki dahetul utrymlivajecca ŭ źniavoleńni. Jamu nieadnarazova prapanoŭvali napisać prašeńnie ab pamiłavańni na imia Łukašenki, ale Statkievič kateharyčna admaŭlaŭsia heta zrabić. Paśla takich admoŭ nacisk na palitźniavolenaha ŭzmacniŭsia.

• 0
• 0
• 0
• 0
• 0
• 0
• 0
• 0