Chronika

11 žniŭnia Bieraściejski abłsud admianiŭ papiaredžańnie, vyniesienaje rajsudom deputatu Małaryckaha rajsavietu (BNF) Uładzimieru Maleju «za arhanizacyju niesankcyjavanaha schodu», bo sprava razhladałsia pry adsutnaści adkaźnika. Administracyjnaja sprava nakiravanaja ŭ toj samy sud na paŭtorny razhlad. Staršyniu Homielskaj abłasnoj filii AHP Uładzimiera Kacoru 12 žniŭnia zatrymali na pastu aŭtainspekcyi ŭ Žłobinie, abvinavaciŭšy ŭ kradziažy aŭtamabila, dy ŭsiaho tolki skanfiskavali niekalki tysiač asobnikaŭ hazety «Vriemia» dy ŭlotki «5+». 13 žniŭnia skarhu ŭ prakuraturu na dziejańni milicyjantaŭ, jakija zatrymali jaho 21 lipienia, padaŭ aktyvist «Zubra» Siarhiej Kuniec. 13 žniŭnia vybarčyja kamisii nie zarehistravali inicyjatyŭnych hrup Valerja Ščukina, Volhi Karač i Alaksieja Haŭrucikava ŭ Viciebsku (apošni — z Narodnaj Hramady), Leanida Marchotki ŭ Salihorsku, Śviatłany Karalovaj (AHP), Źmitra Daškieviča (Małady Front, Miensk). Z 19 čalcoŭ inicyjatyŭnaj hrupy Alaksandra Hałakcijonava (Amścisłaŭ, AHP) da 16 žniŭnia pad ciskam uładaŭ 10 čałaviek vyrašyli vyjści. V.Levanieŭskamu padoŭžyli termin utrymańnia pad vartaj da 13 vieraśnia. Aktyvist «Zubra» Alaksiej Šydłoŭski 16 žniŭnia byŭ aštrafavany na 95 tys. rub. za raspaŭsiudžvańnie ŭlotak. Deputat Mienskaha rajsavietu, namieśnik staršyni PBNF Juraś Ziankovič 17 žniŭnia vyklikany ŭ sud, dzie jaho majuć sudzić za «niepadparadkavańnie patrabavańniam rabotnikaŭ milicyi»: jaho zatrymali 21 lipienia paśla kancertu na płoščy Banhałor. Uładzimieru Maciušenku ź Lepielu 17 žniŭnia zajavili ŭ vykankamie: «Vas ciapier nidzie na pracu nia voźmuć» — za ŭdzieł u inicyjatyŭnaj hrupie kandydata Aleha Tyčyny. 17 žniŭnia sud Pieršamajskaha rajonu Miensku nie zadavoliŭ pazovu Anatola Labiedźki da NDTRK, ANT i STV: lider AHP adstojvaŭ svoj honar, źniavažany filmam «Daroha ŭ nikudy». Lidzija Jarmošyna na pasiedžańni 17 žniŭnia nazvała Sieržuka Sałaša «bazarnym mužykom» i prapanavała adkryć na jaho kryminalnuju spravu za paklop na vybarčuju kamisiju. 12 žniŭnia V.Levanieŭski abviaściŭ haładoŭku: jon patrabuje pryjomu skarhaŭ u vyšejšyja instancyi, sustrečy z sudździom i ź dziećmi, aznajamleńnia z materyjałami spravy. Ju.Ziankoviča 17 žniŭnia aštrafavali na 5 b.v. 18 žniŭnia ŭ prakuraturu Voranaŭskaha rajonu pastupiła skarha na staršyniu Hirkaŭskaha sielsavietu Maryju Kulik, jakaja ahituje žycharoŭ nie padpisvacca za vyłučeńnie Alaksandra Milinkieviča. Prakuror Małaryckaha rajonu 18 žniŭnia vynies kasacyjny pratest na rašeńnie rajonnaha sudu, jaki zadavoliŭ pazoŭ PBNF da načalnika adździełu pa idealahičnaj pracy Małaryckaha rajvykankamu Siarhieja Stroka.

AŠ

• 0
• 0
• 0
• 0
• 0
• 0
• 0
• 0