У афіцыйнай біяграфіі Шэйман — прафесар. Як аказалася, псеўдаакадэміі

Дзіўны факт выявіў блогер d-zholik.livejournal.com.

У дзень прызначэння Віктара Шэймана на пасаду кіраўніка справаў прэзідэнта на сайце лукашэнкаўскага інфармагенцтва БелТА з’явілася афіцыйная біяграфія прызначэнца, у якой генерал-палкоўніка называюць яшчэ і «прафесарам».

Блогер выявіў, што

так званая Акадэмія праблем бяспекі, абароны і правапарадку Расійскай Федэрацыі (абрэвіятура — АБОП) — агульнарасійская грамадская арганізацыя, заснаваная ў Расіі 10 ліпеня 2000. Аказваецца, яе ліквідавалі яшчэ 10 снежня 2008 года рашэннем Вярхоўнага Суда РФ па заяве Генеральнага пракурора РФ.

З афіцыйнага паведамлення Генеральнай пракуратуры Расеі: «Праверкай, праведзенай Генеральнай пракуратурай РФ сумесна з ФСБ Расіі, ФНС Расіі, Мінюстам Расіі, Расадукнаглядам, Геральдычнай радай пры Прэзідэнце Расійскай Федэрацыі, былі выяўлены шматлікія парушэнні заканадаўства ў дзейнасці названай грамадскай арганізацыі. Акадэмія, з’яўляючыся грамадскай арганізацыяй, незаконна пазіцыянавала сябе як дзяржаўная структура, надзеленая адпаведнымі паўнамоцтвамі. Пры ажыццяўленні сваёй дзейнасці незаконна выкарыстоўвала знакі і атрыбуты дзяржаўнай улады, у тым ліку штандар Прэзідэнта Расійскай Федэрацыі.

Акадэмія паўсюдна выкарыстоўвала найменне Акадэмія праблем бяспекі, абароны і правапарадку і АБОП, выключаючы ўказанне на арганізацыйна-прававую форму, што стварала бачнасць дзяржаўнага статусу Акадэміі.

Паводле заключэння Геральдычнай Рады пры Прэзідэнце Расійскай Федэрацыі, Акадэміяй насуперак заканадаўству ў галіне ўзнагароднай і геральдычнай палітыкі былі заснаваны ордэны, медалі, нагрудныя знакі, якія маюць падабенства з дзяржаўнымі. Узнагароды ўручаліся расійскім і замежным грамадзянам, часцяком прадстаўляюцца ім як дзяржаўныя. Узнагародамі Акадэміі і Нацыянальнага камітэта грамадскіх узнагарод, заснаванага Акадэміяй, з 2000 г. па цяперашні час было ўзнагароджана больш за 40 тысяч чалавек.

Акадэміяй незаконна прысвойваліся спецыяльныя званні, якія супадаюць з воінскімі званнямі ў Расійскай Федэрацыі. Арганізацыяй незаконна выкарыстоўваліся ўзоры форменнага абмундзіравання, аналагічныя вайсковай форме.

Супрацоўнікам Акадэміі выдаваліся службовыя пасведчанні, якія маюць падабенства з пасведчаннямі дзяржаўнага ўзору, якія выкарыстоўваліся імі ў асабістых мэтах, што стварала ўмовы для карупцыйных праяваў і дыскрэдытавала дзяржаўную ўладу. Меліся факты выкарыстання службовых пасведчанняў Акадэміі пры здзяйсненні злачынстваў, як правіла, ашуканскіх дзеянняў у асабліва буйных памерах.

Членам Акадэміі прысвойваліся спецыяльныя званні — сапраўдны член Акадэміі, член-карэспандэнт Акадэміі, а таксама ганаровыя званні «Заслужаны дзеяч навукі АБОП» і «Заслужаны юрыст АБОП» з уручэннем адпаведных нагрудных знакаў і пасведчанняў.

Дысертацыйнай радай і вышэйшым атэстацыйным камітэтам Акадэміі прысвойваліся вучоныя ступені і вучоныя званні (доктар навук, кандыдат навук, прафесар, дацэнт). Узоры дыпломаў і атэстатаў, якiя выдаюцца Акадэміяй, мелі падабенства з дыпломамі і атэстаты дзяржаўнага ўзору,

На думку блогера, супрацоўнікі БелТА не ад балды пісалі біяграфію В.Шэймана.

Нават калі сам Шэйман не ведаў, што ўяўляе сабой тая «Акадэмія», то, на думку блогера, ягоныя біяграфічныя звесткі павінны былі правяраць адпаведныя інстанцыі. А калі не правяралі, то або халатна паставіліся да сваіх абавязкаў, або Шэйман з нейкіх прычын не падпадае пад звыклую працэдуру праверкі.

Блогер таксама ставіць пытанне, ці не мог і Шэйман атрымліваць неабгрунтаваныя даплаты да службовага акладу за вучонае «званне» лжэакадэміі.

Дарэчы, беларускае аддзяленне АБОП, гэтага кірмаша постсавецкай фанабэрыі, узначальваў нехта Мікалай Іванавіч Чаргінец.

• 0
• 0
• 0
• 0
• 0
• 0
• 0
• 0