ТБМ стварыла групу па пытанні заканадаўчай роўнасці беларускай і рускай моў
Рада грамадскага аб'яднання «Таварыства беларускай мовы імя Францішка Скарыны» (ТБМ) на пасяджэнні 11 студзеня стварыла адмысловую групу па пытанні заканадаўчай роўнасці беларускай і рускай моў, паведаміў старшыня ТБМ Алег Трусаў.
Групу ўзначаліў намеснік старшыні ТБМ Дзяніс Тушынскі. Паводле слоў Трусава, група створаная ў сувязі з тым, што на працягу больш за 10 гадоў сітуацыя з выкарыстаннем дзяржаўных моў у краіне развіваецца не на карысць беларускай. Праблему няроўнасці ўжывання гэтых моў прызнае нават Канстытуцыйны суд, адзначыў кіраўнік ТБМ.
26 снежня 2014 года КС накіраваў адказ на зварот таварыства, у якім адзначыў, што пытанне аб выкарыстанні дзвюх дзяржаўных моў неаднаразова разглядалася Канстытуцыйным судом. У дакуменце сказана, што пазіцыі КС адносна розных пытанняў выкарыстання беларускай мовы ў грамадскіх адносінах змяшчаюцца ў шэрагу рашэнняў суда, якія тычацца ўжытку дзяржаўных моў ў сферах абслугоўвання, сістэме страхавання, пазначэнні геаграфічных аб'ектаў, адукацыі.
Разам з тым у КС канстатуюць, што «пры фармальна-юрыдычным раўнапраўі дзяржаўных моў на практыцы баланс іх выкарыстання не заўсёды захоўваецца». Гэтай жа фармулёўкай Канстытуцыйны суд карыстаўся ў снежні 2003 года, калі пытанне роўнасці беларускай і рускай моў разглядалася на асобным пасяджэнні суда.
«Яны прызналі, што ніякай роўнасці ў нас няма, мы дзякуем ім за тое, — адзначыў Трусаў. — Яны прызналі, што пачынаючы з 2003 года нічога не змянілася, хоць па ідэі нешта павінна было змяніцца пасля рашэння суда (у 2003 годзе КС прапаноўваў парламенту разгледзець пытанне аб папраўках у моўнае заканадаўства)».
Таварыства беларускай мовы мае стасункі з Палатай прадстаўнікоў па пытаннях роўнага ўжытку моў больш за 10 гадоў, адзначыў кіраўнік аб'яднання. Цяпер гэтыя перамовы з парламентарыямі будзе весці адмысловая моўная група ТБМ.
Праз дзевяць месяцаў пасля вызвалення памёр палітвязень Валерый Богдан7
Каментары