У вёску Вялікая Машчаніца Бялыніцкага раёна пасьля вызваленьня з калёніі вярнуліся два чалавекі, якія раней абвінавачваліся ў забойстве сям’і з шасьці чалавек. Але адказу на галоўнае пытаньне – хто забіў вясковую сям'ю, у тым ліку і двое дзетак – дагэтуль няма.
У ноч 1 чэрвеня 2005 года адбылося жудаснае злачынства ў Вялікай Машчаніцы. А праз дзень ужо былі затрыманыя шэсць маладых людзей ва ўзросце ад 18 да 24 гадоў з гэтай вёскі. Пяцёра з іх былі абвінавачаныя ў забойстве. Расследаванне па справе цягнулася амаль паўтары гады, адзінаццаць месяцаў ішоў судовы працэс у Магілёўскім абласным судзе пад старшынствам суддзі Міхаіла Мельнікава. У выніку судовага разгляду пракурор запатрабаваў для двух падазраваных выключную меру пакарання – расстрэл. Яшчэ для трох чалавек – пажыццёвае зняволенне.
Аднак 2 лістапада 2007 года судовая калегія Магілёўскага абласнога суда ўсім гэтым хлопцам у сувязі з недаказанасцю віны вынесла апраўдальны прысуд. Адзін з падсудных – Аляксандр Клепча – быў вызвалены з-пад варты ў зале суда. Астатнія былі пакараныя тэрмінамі зняволення ад 4 да 10 гадоў за іншыя злачынствы: крадзяжы ды згвалтаванне. У лютым 2008 году адбылося пасяджэнне Вярхоўнага суда РБ, які цалкам зацвердзіў прысуд Магілёўскага абласнога суда.
І вось у выніку абвешчанай у мінулым годзе амністыі 20 траўня быў вызвалены з-пад варты ў Аршанскай калоніі Генадзь Салаўёў, а 23 траўня – з Бабруйскай калоніі Сяргей Юшкевіч. Абодва адразу ж прыехалі да бацькоў у Вялікую Машчаніцу. Аднаго з іх у свой час пракурор патрабаваў прысудзіць да расстрэлу, другога – да пажыццёвага зняволення.
Дагэтуль няма адказу на галоўнае пытанне – хто забіў вясковую сям’ю з шасці чалавек, у тым ліку двух малых дзетак. Тым часам новыя зоркі на пагоны за гэты час паспела атрымаць амаль усё кіраўніцтва Бялыніцкага РАУС. Як кажуць людзі, – за тое, што ў свой час імгненна выконвалі любы загад былога старшыні райвыканкама Аляксандра Ільянава, які зараз сам знаходзіцца пад вартай.
Цяпер чытаюць
«Шкада, што людзі мяне лічаць такім ідыётам». Дзядок расказаў, як яго змаглі высачыць пасля пяці месяцаў падполля1
Каментары