Смаргонскі раённы аддзел Следчага камітэта праводзіць праверку па факце траўміравання дзіцяці ў Смаргонскім раёне, паведаміў БЕЛТА афіцыйны прадстаўнік УСК па Гродзенскай вобласці Сяргей Шаршаневіч.
Дзеці днём 7 чэрвеня гулялі ў двары прыватнага дома ў в. Пазборцы. 9-гадовы хлопчык, перасякаючы па просьбе роднай 6-гадовай сястры сякерай вяроўку, трапіў ёй па пальцы. З дыягназам «траўматычная ампутацыя 3-га пальца левай кісці» дзяўчынка была дастаўленая ў раённую бальніцу, адкуль накіраваная для аказання неадкладнай дапамогі ў адну з профільных медыцынскіх устаноў Мінска.
Следчыя з удзелам экспертаў агледзелі месца здарэння, апыталі сваякоў і суседзяў пацярпелай. Прызначаная судова-медыцынская экспертыза.
Выяўлена, што дзеці выхоўваюцца ў звычайнай сям'і, якая пражывае ў Мінску. Усе характарызуюцца станоўча. У дзень здарэння сям'я знаходзілася ў гасцях у сваякоў. Дарослыя працавалі на падворку па гаспадарцы, дзеці засталіся на час без нагляду. Пры гэтым траўманебяспечны інструмент знаходзіўся ў вольным доступе.
Следчы камітэт звяртае ўвагу, што дарослыя павінны ліквідаваць траўманебяспечныя сітуацыі і сістэматычна навучаць дзяцей асновам прафілактыкі траўматызму. Пры гэтым важна не развіць у дзіцяці пачуццяў нясмеласці і страху, а, наадварот, давесці яму, што небяспекі можна пазбегнуць, калі паводзіць сябе правільна. Вельмі важна для дарослых самім правільна паводзіць сябе ва ўсіх сітуацыях, дэманструючы дзецям бяспечны лад жыцця.
Каментары