Пранкер: Мы надзелі сукенкі ды выйшлі на Зыбіцкую чапляць дзяўчат
Днямі мінчук Мікалай Аляксейчык павесяліў інтэрнэт сваім вельмі сонным пранкам. Хлопец укладваўся спаць проста пасярод пешаходнага перахода, на эскалатары, у ліфце ды краме.
Мікалай пакуль яшчэ не вельмі дасведчаны пранкер, але цвёрда вырашыў працягваць эксперыменты з грамадствам. Мы распыталіся, навошта ён гэта робіць і ці не страшна быць «не нармальным».
«Калі выходзіш з зоны камфорту, прысутнічае мінімальны страх. Я не скажу, што мне была зусім абыякавая рэакцыя мінакоў. Я разумеў: вось зараз на мяне будуць глядзець, будуць неяк мяне ацэньваць. Магчыма — добра, магчыма — не. То бок пэўнае хваляванне было. Але людзі, якія пазітыўна глядзяць на мае выбрыкі, зараджаюць энергіяй, і я лаўлю кураж. Страх, які адчуваеш напярэдадні, перакрываецца тымі эмоцыямі, якія адчуваеш пасля», — кажа хлопец.
Ролю пранкера Мікалай прымераў на сябе год таму, калі адразу пасля дэнамінацыі паспрабаваў разлічыцца свежым зялёным лісцем з дрэва. Навошта? Ды проста дзеля смеху.
«Па-першае, гэта весела. А па-другое, даўно хацелася зрабіць нешта, што выходзіць за межы. Звычайны чалавек у звычайным жыцці мяркуе, што гэта ж немагчыма ўзяць коўдру, падушку ды легчы дзе-небудзь у гандлёвым цэнтры ці на эскалатары. Мне спачатку таксама здавалася, што гэтага нельга рабіць. А потым я падумаў: а чаму не? І вырашыў рабіць такія штукі. Яны не супярэчаць закону, але з пункту гледжання нейкай маралі выглядаюць няправільнымі», — працягвае малады чалавек.
З міліцыяй у яго эксцэсаў пакуль што не здаралася. Супрацоўнікі мэблевай крамы пагражалі выклікаць праваахоўнікаў падчас соннага перформансу ў гандлёвай залі, але да гэтага не дайшло.
«Мне хочацца, каб людзі не пужаліся, а каб ім было вельмі смешна ад усяго, што адбываецца. Хочацца паказаць ім незвычайную сітуацыю, каб яны падумалі: «Як такое можа быць? Што я толькі што ўбачыў?», — даводзіць Мікалай.
— Плюс гэта дае папулярнасць і на гэтым можна зарабляць грошы. То бок ты займаешся тым, што табе падабаецца, і яшчэ нейкія грошы зарабляеш, што таксама даволі прыемна».
Мікалай ужо атрымаў вышэйшую адукацыю, вывучыўся на маркетолага ў БДУІР, і цяпер працуе на фірме маркетолагам-эканамістам. Мае ён і сваё ІП, займаецца падарункамі. А нядаўна хлопец прайшоў акцёрскія курсы.
Мікалай не звязвае рэакцыю мінчукоў на вясёлыя правакацыі з беларускай ментальнасцю.
«Гэта, хутчэй, залежыць ад таго, адзін чалавек гэта назірае ці некалькі. Калі чалавек адзін, то яго складаней вывесці на эмоцыі, а вось калі кампанія, людзі нашмат ярчэй рэагуюць на нейкія знешнія фактары, — кажа ён. — Калі міма будзе праходзіць незвычайны персанаж, а ты ідзеш адзін, то можаш зрабіць выгляд, што ўвогуле яго не заўважаеш, такое часта бывае. А калі вас двое, то вы як мінімум кінеце позірк адно на аднаго, заўсміхаецеся».
Мікалай не толькі сам удзельнічае ў падобных правакацыях, але і падцягвае сяброў, што таксама ўмеюць весяліцца і лёгкія на пад’ём. Пастаяльцы ўстаноў на Зыбіцкай маглі заўважыць яркую кампанію прыгажуноў-хлопцаў у сукенках — гэта былі яны.
«Мы проста вырашылі паглядзець, як будуць рэагаваць людзі і ці можна падчапіць дзяўчат, калі мы будзем у сукенках. Апрануліся, выйшлі на Зыбіцкую, вельмі хутка прыцягнулі ўвагу дзяўчат, забралі іх і паехалі далей весяліцца», — прыгадвае пранкер.
Здаралася яму дэфіляваць і ў адных майтках.
«Паспрачаўся з дзяўчынай, што прыйду да яе на пошту ў майтках. Яна не паверыла, а я прыйшоў. Яна вельмі здзівілася, як і ўсе тыя жанчыны, што былі на пошце. У цэлым рэакцыя была даволі пазітыўнай», — каментуе ён. Што праўда, на саму пошту хлопец ішоў у шортах, а зняў іх ужо перад самым уваходам.
Мікалай кажа, што большасці дзяўчат падабаецца тое, што ён робіць, таму ўвагай з іх боку не абдзелены. Але сталай сяброўкі цяпер не мае.
Бацькі пра творчыя эксперыменты сына таксама ведаюць, толькі не зусім разумеюць.
«З бацькамі не так усё проста. Яны, канечне, ведаюць, што я раблю. Але яны старой школы, таму не разумеюць, навошта. Я паказваў ім апошняе відэа, дзе я сплю. Ім спадабалася, яны пасмяяліся, сказалі, што вельмі смешна», — дадае малады чалавек.
Цяпер Мікалай збіраецца ладзіць пранкі штотыдзень, таму калі ўбачыце ў горадзе штосьці вельмі незвычайнае, не пужайцеся. Магчыма, гэта чарговы пранк.
«У Віцебску заходзіў у тралейбус і казаў «Слава Украіне!». Украінца ў 67 гадоў пасадзілі за каменты, напісаныя пасля гібелі хроснай дачкі пад абстрэлам у Кіеве7
Каментары